Plenaria Parlamentu Nasional. Imajen Tatoli Antonio Goncalves.

DILI, 14 jullu 2021 (TATOLI)—Reprezentante povu iha fukun Parlamentu Nasionál, husu Ministériu Edukasaun, Juventude no Desportu (MEJD) hadi’a kurríkulu nasional, nune’e adota baze kreatividade no kompetente.

Notísia Relevante: MESSK buka uniformiza padraun mínimu kurríkulu ba IESPP

“Bankada KHUNTO rekomenda ba Ministériu Edukasaun, ensinu Bázika no Superiór, tenke hadi’a Kurríkulu Nasional nune’e bele adota kurríkulu hó baze kreatividade no kompetente. Atu nune’e, bele responde ba merkadu ka kampu serbisu iha ita-nia país ida-ne’e,” Vise-Xefe Bankada KHUNTO, Deputadu António Verdiál de Sousa, levanta liuhosi plenária, kuarta ne’e.

Nia dehan, kada tinan Ensinu Superiór sira sempre halo graduasaun no prodús alunu no aumenta ba beibeik, maibé graduandu sira la kompatível ho merkadu serbisu ne’ebé mak hamosu problema no problema hirak ne’e ninia abut loloos mak kurríkulu no linguajen.

Bankada KHUNTO nafatin rekomenda ba Governu liuhosi Ministériu Edukasaun Juventude no Desportu (MEJD), rezolve tiha destinu profesóra kontratadu no voluntáriu sira, no presiza aloka verba hodi rekruta profesór sira.

“Ita hotu hatene katak iha tinan kotuk, ita aprova verba ho motante orsamentu ne’ebé boot atu halo rekrutamentu ba profesór sira  iha Timor laran tomak maibé ita la haree,” nia dehan.

Iha parte seluk, Bankada KHUNTO realsa, aula online la efetivu tanba iha área rurál laiha internet, eletrisidade no estudante no profesór balun laiha komputadór ka laptop rasik.

“Programa online ladún efetivu. Ita hotu hatene katak eskola públiku hotu iha territóriu nasionál laiha komputadór ka laptop ba mestre sira hodi uza. Estudante barak mak mai hosi família hó ekonomia level ki’ik ka menus atu hola mobile android no pulsa telefone. Atu hateten katak, sistema online só uza ba eskola privada balun de’it, nune’e mós bele hala’o ba família ne’ebé iha ekonomia di’ak,” Prezidente Komisaun G ne’ebé trata asuntu edukasaun, seguransa sosiál no igualdade jéneru ne’e hateten.

Nia observa katak, problema krime iha sosiedade aas tebes no sensível uitoan maibé mosu problema krime tanba ema-nia edukasaun ne’ebe mínimu, bele lori mentalidade ida-ne’ebe la díak no wainhira mentalidade la di’ak, maka ema ne’e ninian hanoin mós badak no halo problema krime ba ema seluk. Problema seluk maka ekonomia ne’e rasik.

Prezidente Komisaun G ne’e nota katak, dalan viavel liu maka liuhosi prosesu edukasaun sívika iha rai laran no prosesu edukasaun sívika ne’e sei menus iha implementasaun hosi eskola sira durante ne’e.

Tuir Bankada KHUNTO niahanoin katak edukasaun tenke hahú hosi uma laran ka família no parte hosi Governu liuhosi Ministériu Edukasaun, ikus liu mak sosiedade sivil no parte konfisoens relijioza sira.

Notísia Relevante: DNER planeia elabora kurríkulu ba ensinu sekundáriu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here