Matebian, fotógrafu profisionál, Guido Sam Martins. Imajen facebook.

DILI, 14 jullu 2021 (TATOLI)-Reprezentante povu iha uma-fukun Parlamentu Nasionál, husi Munisípiu Liquiça, no mós Autoridade Munisipál   Liquiça, rekoñese obra saudozu Jornalista Samuel Guido Martins “Sam” metin iha sira-nia fuan.

Ho Matebian ninia kontribuisaun maka konsege hasai foto kona-ba masakre 6 abríl 1999 iha Igreja São João de Brito bainhira milisia pro-integrasaun asalta populasaun hodi oho ema barak mak mate.

 Notísia Relevante :PNTL-SIJK hein rezultadu teste médika ba mate-isin Guido Sam Martins

Xefe Bankada Partidu Demokrátiku (PD) nu’udar mós Liquiçá oan, António da Conçeição ‘Kalohan’, sente lakon ema ne’ebé sai sasin ba masakre importante durante prosesu luta ba libertasaun nasionál.

“Ita lakon ema ida-ne’ebé bele mós fó sasin ba trajédia ne’ebé akontese iha Igreza São de Brito Liquiça. Ho jornalista sira-nia serbisu maka bele kontribui hodi divulga ba aktu violénsia ne’ebé akontese iha Liquiça. Ne’ebé ita sente lakon, maske ita hotu-hotu hatene dalan mak ida-ne’e,” Kalohan informa ba Agência TATOLI, iha uma fukun, kuarta ne’e.

Deputadu husi Partidu Demokrátiku ne’e, hato’o ninia sentidu kondolensia hodi fó omanajen ba Matebian Sam inklui jornalista seluk ne’ebé husik ona mundu.

Nia konsidera servisu jornalista importante tebes maske dala-barak la hetan rekoñesimentu husi públiku.

Iha fatin hanesan Sekretária Meza Parlamentu Nasionál, Deputada Lídia Norberta dos Santos Martins, nu’udar mós Liquiçá oan hato’o sentida kondolensia ba matebian.

“Hanesan Liquiçá oan bainhira rona SAM jornalista profisionál ne’ebé durante okupasaun Indonézia, asume papél importante tebes, ho korajen nia hasai foto no nia konsege asegura dokumentasaun masakre 6 abríl iha Liquiçá. Ida-ne’e úniku, laiha ema hotu-hotu atu halo esforsu ida-ne’e, só ema barani mak bele halo no jornalista SAM barani hasai foto iha situasaun defísil ne’e,” nia dehan.

Deputada Bankada FRETILIN ne’e husu ba jornalista Timor-oan sira atu banati tuir esperiénsia ne’ebé jornalista Timor-oan sira-ne’ebé mate ba funu inklui SAM ne’ebé oras ne’e hakotu iis.

“SAM konsege luta hodi defende Timor-Leste liuhosi sira-nia kna’ar. Sira-nia espíritu korajen, ida-ne’e tenke sai hanesan referénsia ba jornalista juniór sira, ba mós Liquiçá oan sira, hodi banati tuir tanba ne’e nu’udar ezemplu úniku,” nia hatutan.

Nune’e mós Administradór Munisípiu Liquiçá, Pedro Paulo Gomes, sente triste bainhira rona informasaun katak  matebian  hakotu ona iis.

“Ha’u kuandu rona informasaun jornalista ne’e husik ona mundu, ha’u sente triste tanba jornalista ne’ebé aten barani, nia bele tama iha situasaun ida-ne’ebé invazór sira iha, nia prontu tama ho inisiativa tomak atubele hasai informasaun ba li’ur,” nia katak.

Autoridade Munisipál ne’e promete sei ko’alia ho Prezidente Veteranu Munisípiu Liquiça atu preverza obra matebian nian liliu masakre 6 abríl 1999 iha Igreja São João de Brito.

“Ita sei ko’alia hamutuk ho prezidente kombatente munisípiu nian atu tau konsiderasaun ba ita-nia saudozu ne’ebé fó nia kontribuisaun ba prosesu luta liuhosi dokumentasaun ne’ebé nia halo ona, espesialmente ba masakre Liquiçá. Ne’e ita tenke louva no tenke dignifika nia tanba hanesan aswa’in ida,” Administradór Munisípiu Liquiçá ne’e hateten.

Entretantu, Prezidente Konsellu Juventude Liquiçá (CNJTL-sigla portugés), Laurindo dos Santos, lori juventude munisípiu refere nia naran hato’o sentidu kondolénsia profunda ba família no saudozu SAM ne’ebé durante fó nia kontribuisaun ba Timor-Leste.

“Espesialmente  dokumentasaun ba akontesimentu masakre 6 abríl 1999 iha Igreza São de Brito Liquiçá, sé laiha SAM maka evidénsia akontesimentu laiha dokumentu ruma, tanba ne’e Liquiçá konsidera eroi ida-ne’ebé fó nia kontribuisaun ba prosesu ukun rasik-aan,” Xefe Juventude Munisípiu Liquiçá ne’e hateten.

 Notísia Relevante :Rezultadu teste swab ba mate-isin Guido Sam Martins negativu

Jornalista: Evaristo Soares Martins

Editór: Agapito dos Santos

HAKEREK NO HATÁN

Please enter your comment!
Please enter your name here