Sekretáriu Estadu Arte no Kultura, Teófilo Caldas, Autoridade munisipál, postu no suku, reprezentante CCLN munisípiu Baucau, hamutuk PNTL foto hamutuk hafoin harii plaka iha fatin konstrusaun sentru kulturál, iha Villa nova, Baucau, kuarta (14/07). Imajen TATOLI/Natalino Belo

BAUCAU, 14 jullu 2021 (TATOLI)–Sekretáriu Jerál Konsellu Munisipál Kombatente Libertasaun Nasionál Baucau (CMCLNB, sigla portugés), Manuel ‘Alari’ da Costa Soares, hateten, veteranu nafatin prontu serbisu no kolabora ho parte kompetente atu dezenvolvimentu iha Baucau.

“Konsellu veteranu nafatin hatudu nia prontidaun hamutuk ho Estadu no autoridade munisipál atu asegura buat hotu ne’ebé di’ak ba nasaun, liuliu ba munisípiu Baucau, ba veteranu laiha rezerva tanba fó an ona ba prosesu liberta pátria no dala-ida tan nafatin prontu fó an hamutuk atu liberta povu liuhosi prosesu hotu ne’ebé ita hotu hakarak halo,” Sekretáriu Jerál CMCLNB dehan iha ámbitu monta plaka iha rai atu harii sentru kulturál, iha Villa nova, kuarta ne’e.

Notísia relevante: SEAK sei halo levantamentu dadus konstrui sentru kulturál iha Baucau

Alari konsidera, importante tebes prezensa sentru kulturál iha munisípiu Baucau tanba bele habelar rikusoin lisan hanesan identidade no konserva istória rezisténsia ne’ebé sai poténsia boot Timór hodi hatudu ba mundu katak maski hanesan rai kiik, maibé iha istória boot.

Iha fatin hanesan, Xefe suku Bahu, Manuel Francisco Rodrigues Gusmão, prontu kontribui no kolabora iha prosesu dezenvolvimentu iha rejiaun ne’e inklui asegura konstrusaun sentru kulturál.

“Ami hodi naran líder komunitáriu tomak, hamutuk ho  admistradór postu inklui Sekretáriu Jerál veteranu, prontu serví no laiha rezerva no kualker momentu,” nia afirma.

Manuel dehan, hanesan líder komunitáriu ne’ebé kiik liu iha baze hamutuk komunidade, sei haree mós ba parte tradisaun no apresia inisiativa Sekreteria Estadu Arte Kultura (SEAK) atu harii sentru kulturál, tanba ne’e prontu nafatin asegura iha prosesu konstrusaun.

“Baucau uluk ema hotu hatene Muturabu, maibé ami hakarak koko Baucau ne’e fuan di’ak bolu dehan Baucau Muturau,” nia akresenta.

SEAK harii ona plaka ne’ebé sei konstrui fatin sentru kulturál ho funsaun atu sai merkadu tradisionál permanente atu fa’an tais, objetivu Kultura, halo Aktividade kultura kategoria temporál hanesan festivál, espozisaun, kompetisaun múzika no dahur inklui iha mos muzeu kulturál atu konserva eransa kultura ne’ebé beala sira husik hela.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here