Pesoál saúde prepara hela vasina Sinovac. Imajen TATOLI/Francisco Sony

DILI, 14 jullu 2021 (TATOLI)—Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta no Ministra Saúde (MS), Odete Maria Freitas Belo, aprezenta proposta iha reuniaun Konsellu Ministru (KM), kona-ba estratéjia vasinasaun foun kontra COVID-19 ba kada munisípiu.

“Ho aprovasaun ne’e, sei halo mobilizasaun rekursu másimu ba vasinasaun iha kada munisípiu tuir kalendáriu ne’ebé defini ona, ho inísiu iha munisípiu risku boot to’o ba munísipiu hotu,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kuarta ne’e.

Ho estratéjia foun ne’e, membru Governu sira sei ba kada munisípiu hodi fahe informasaun ba populasaun sira ligadu ho benefísiu vasina ne’e rasik.

“Membru Governu sira sei desloka ba kada munisípiu, ezemplu maka Ministru Defeza ninia área iha Bobonaro, entaun nia tenke ba fatin ne’e, maibé kona-ba kalendáriu, komisaun interministeriál vasinasaun mak sei  divulga tanba sira mak responsabiliza,” nia akresenta.

Objetivu destaka membru ezekutivu sira iha munisípiu atu aselera lalais liután programa vasinasaun.

“Hanesan oportunidade rasik ba Governu liuhosi ninia membru sira atubele iha komunikasaun direta ho autoridade sira iha munisípiu no komunidade atubele esklarese di’ak liután pro kontra vasina,” Portavóz Governu subliña.

Totál doze vasina ne’ebé fó ona ba populasaun elijível hosi idade 18 ba leten, tuir dadus to’o iha loron 14 jullu dader tuku 10:00, populasaun sira iha Dili ne’ebé simu ona vasina doze dahuluk hamutuk 118.530 (55,4%) no iha territóriu tomak 237.946 (31,5%).

Nune’e, hirak ne’ebé simu vasina kompleta ka doze daruak iha Dili hamutuk 30.588 (14,29%) no iha territóriu tomak 42.942 (5,69%).

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here