Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (14/07). Imajen TATOLI/Egas Cristóvão

DILI, 14 jullu 2021 (TATOLI)–Governu kontinua deside hodi impoin Serka Sanitária iha munisípiu Dili ba loron 14, maibé depende ba evolusaun surtu COVID-19 iha Timor-Leste.

Ezekutivu sira foti desizaun ne’e hafoin análiza ba aprezentasaun pontu situasaun epidemiolójika nasionál hosi Sala Situasaun, Sentru Integradu Jestaun Krize (CIGC, sigla portugés).

“Konsellu Ministru delibera no aprova Projetu Rezolusaun Governu, ne’ebé mantein impozisaun Serka Sanitária iha Dili ba loron 14 tan, to’o oras 23:59 loron 29 jullu 2021,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu.

Nune’e, bandu nafatin sirkulasaun ema sira iha Dili no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku.

Portavóz Governu dehan, bainhira períodu ne’e ramata, Governu sei avalia filafali iha semana ida nia laran no situasaun atuál hodi halo alterasaun ba rezolusaun, nune’e bele deside renova ou termina.

Maski moras ne’e iha munisípiu sira kontinua menus, númeru infesaun iha Dili kontinua a’as, maibé kompara ho fulan kotuk númeru infesaun kada loron menus.

Tanba ne’e, Governu iha esperansa ho kontinuasaun vasina, númeru infesaun bele tun ba bebeik.

Proibisaun sirkulasaun ne’e la abranje ba ema sira ne’ebé komprova ona vasinasaun kompleta ka doze rua kontra COVID-19, nune’e mós ba labarik sira iha tinan neen mai-kraik ne’ebé akompaña inan-aman sira.

“Delibera mós katak oras kontrolu sentru integradu atu tama no sai hosi Dili, sei funsiona durante oras 24 kada loron,” nia subliña.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here