Carmel Budiardjo. Imajen/rightlivelihood

DILI, 14 jullu 2021 (TATOLI)—Liuhosi reuniaun Konsellu Ministru (KM), Governu delibera no aprova nota votu pezar ba ativista direitu umanu, Carmel Budiardjo, ne’ebé mak hakotu iis iha loron sábadu (10/07), iha Londres, Reinu-Unidu.

“Matebian nu’udar defensora ba timor-oan sira-nia ukun rasik-an,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu.

Iha nota pezar, Governu hateten katak ‘Carmel Budiardjo Timor-Leste sei la haluha no sei hanoin nafatin ho domin boot, admirasaun no respeitu ba ninia kompromisu ho direitu umanu, justisa no solidariedade.’

Carmel Budiardjo nu’udar fundadora ba organizasaun ida naran Tapol (Tahanan Politik), ne’ebé liuhosi buletin, membru sira prodús no imprime informasaun inklui halo kampaña barak ba direitu umanu iha Indonézia no Timor-Leste.

Governu konsidera Carmel nu’udar defensora ne’ebé nunka sente kolen defende direitu umanu no direitu ba auto determinasaun povu Timor-Leste nian.

“Timor-oan sira hotu ne’ebé maka hatene atividade no kompaña sira ba direitu iha rai-li’ur hatene sé mak Carmel Budiardjo. Nia mós iha tinan hirak liubá hetan rekoñesimentu liuhosi ordem Timor-Leste hosi ita-nia Estadu,” Ministru Prezidénsia ne’e haktuir.

Carmel Budiardjo moris iha Londres, iha loron 18 juñu 1925, ho sidadaun Grã-Bretanha no kaben ho ema Indonézia, Suwondo Budiardjo.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here