Xefe Suku Goulolo, Tiago Laca-Mali. Imajen Tatoli/Sérgio da Cruz.

BOBONARO, 14 jullu 2021 (TATOLI)—Uma-kain 243 iha suku Goulolo, postu administrativu Cailaco, munisípiu Bobonaro, seidauk asesu eletrisidade.

Suku ne’e kompostu hosi aldeia tolu, no aldeia ida asesu ona maibé aldeia rua seluk seidauk asesu hanesan  aldeia Ilatbote no Malileat.

Notísia relevante:Uma Kain 12.323 iha Cailaco Seidauk Asesu ba Eletrisidade

“Antes ne’e ami ba hasoru asesór prinsipál Ministériu Obra Públika, ne’ebé promete katak sei instala iha 2021, maibé iha realidade suku seluk mak hetan uluk,” Xefe Suku Goulolo, Tiago Laca-Mali, hateten ba jornalista Agência Tatoli, iha merkadu Maliana, kuarta ne’e.

Nune’e mós komunidade Fransisco Batu-Mali husu Governu atu tau prioridade hodi instala liña eletrisidade iha suku ne’e tanba eskola oan sira labele estuda iha tempu kalan.

Alende ne’e, komunidade aldeia rua ne’e susar atu asesu informasaun hosi rádiu no televizaun, tanba kalan hela iha nakukun laran.

Suku Gulolo iha aldeia tolu mak hanesan Latbote ho populasaun 451, Malileat iha populasaun 431  no Suriubu ho populasaun 571.

Totál populasaun iha suku  ne’e hamutuk 1.445 kompostu hosi feto 741 no mane 714, mai hosi uma-ka’in hamutuk 370.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here