Eskola ESP númeru 02 Villa nova, Baucau. Imajen TATOLI/Natalino Belo

BAUCAU, 14 jullu 2021 (TATOLI)—Adjuntu Diretór Eskola Ensinu Sekundária Públiku (ESP) númeru 02 Villa nova, munisípiu Baucau, Titos Almeida, hateten, desde segunda (12/07), parte eskola hahú ona preparasaun reativa hikas aula prezensiál ne’ebé nafatin kumpre regra prevensaun COVID-19.

“Ita forma kadeira 25 iha sala aula ida, nune’e bele akumula alunu másimu 25 no mínimu 15, agora ita hamos sala no domingu mak sei dizifeta sala, hafoin segunda (19/07) reativa ona aula prezensiál,” Adjuntu Diretór Eskola, informa iha ninia knaar fatin, kuarta ne’e.

Adjuntu Diretór ESP numeru 02 Villa nova, Baucau, Titos Almeida. Imajen TATOLI/Natalino Belo

Turnu aplika ba 2o no 3o ano, iha parte dadeer oras 08:00 to’o 10:00, enkuantu 1o ano sei la halo turnu tanba estudante mínimu ona, ne’ebé sei hahú aula iha oras 12:15 meiu dia.

“Karta sirkulasaun fó orientasaun ba Diretór Eskola hotu atu halo preparasaun ne’ebé tenke kumpre nafatin regra hosi saúde mundiál,” nia akresenta.

Antes ne’e, parte eskola simu ona orientasaun hosi edukasaun munisipál iha semana kotuk katak sei reativa eskola iha loron segunda, 19 jullu.

Tanba ne’e, Eskola ESP 2 komprometidu bainhira reativa aula prezensiál, sei kumpre regra prevensaun COVID-19 hanesan prepara bee atu fase liman, aula másimu 25, no profesór sira hola parte iha kampaña vasina no orienta alunu sira uza máskara.

Eskola ESP númeru 02 Villa nova, Baucau. Imajen TATOLI/Natalino Belo

Nune’e, maioria profesór iha eskola ne’e partisipa ona vasinasaun, ne’ebé profesór permanente 49 mak simu ona vasina kompleta, enkuantu tolu seluk foin simu doze dahuluk.

“Profesór sira preparadu atu reativa aula prezensiál normál, maibé desizaun mai hosi Governu,” Titos hatutan.

Adjuntu Diretór komunika ona ba alunu no profesór sira kona-ba regra ne’ebé presiza kumpre durante aula prezensiál iha ámbitu pandemia.

Totál estudante iha ESP 2 hamutuk 1.005, aumenta 82 iha klase paralelu Uailili, ho totál profesór permanente no kontratadu inklui funsionáriu administrasaun no seguransa hamutuk 73.

Jornalista : Natalino Belo

Editora : Julia Chatarina

HAKEREK NO HATÁN

Please enter your comment!
Please enter your name here