Formadora Consultóriu da Língua Para Jornalista (CLJ), Margarida Henriques, fó formasaun ba jornalista sira iha iha Quintal Boot, Dili. Imajen Tatoli/Cancio Ximenes.

DILI, 14 jullu 2021 (TATOLI)—Instituto Camões liuhosi projetu Consultóriu da Língua Para Jornalista (CLJ) kapasita jornalista timor-oan sira iha língua portugés atu eleva koñesimentu no kapasidade ba hakerek notisia iha lingua portugeza.

Formadora Consultóriu da Língua Para Jornalista (CLJ), Margarida Henriques, hateten formasaun ne’e ho nível báziku ba nível A1 no A2, ne’ebé atu forma profisionál ba área jornalizmu hanesan jornalista, editór, operadór ba kamara no sinegráfista.

Notísia Relevante: Institutu Camões renova akordu formasaun ba jornalista sira ba tinan tolu

“Formasaun ne’e ho nível báziku, A1 no A2, hodi hadi’a koñesimentu língua portugés ba  jornalista sira, atu eleva kapasidade ba hakerek notisia iha dalen portugés,” Margarida Henriques hateten ba Agência Tatoli, iha Quintal Bo’ot, Dili, kuarta ne’e.

Nia informa, formandu sira-ne’ebé tuir formasaun nível báziku hanesan nível A1 no A2 ne’e, hamutuk na’in-23.

“Agora dadaun ita iha formandu 23 ba formasaun ne’e maibé dadaun ne’e balun la mai tuir aula tanbá hala’o servisu nomós pandemia Covid-19. No, iha ne’e, sala-de-aula mós la permite atu akumula ema barak,” nia akresenta.

Iha sorin seluk, Editór hosi Rádiu Televizaun Timor-Leste (RTTL,E.P), Arsenio Pereira da Silva hateten, sente kontente tanba bele partisipa iha formasaun ne’e, ho nune’e bele aumenta koñesimentu ba lian portugés.

“Ha’u tuir formasaun ne’e iha área jornalista nian, nune’e ba futuru ha’u-nia profisaun hanesan editór bele adapta tan ho termu foun sira-ne’ebé iha liu-liu iha ita-nia situasaun agora,” nia dehan.

Nia informa, durante ne’e tuir formasaun matéria ne’ebé aprende kona-bá funsionámentu língua portugés hanesan konjuga verbu no gramátika ba língua portugués nian, aprende mós kona-bá sigla ba instituisaun mídia no organizasaun internasionál hanesan RTTL no PNUD.

Entretantu, jornalista ne’ebé tuir formasaun iha Konsultóriu Lian ba Jornalista (CLJ) hosi Instituisaun mídia hanesan Timor-Post, Agência Notisiosa Timor-Leste-Tatoli (ANTIL), Rádiu Televizaun Timor-Leste (RTTL), Loluwari, Lafaek News, Díli Post, Rádiu Televisaun Maubere (RTM), Rakambian, RTM, no formandu hosi Ministériu Asuntu Parlamentár no Komunikasaun Sosiál (MAPKOMS).

Benefisiáriu ba projetu CLJ desde hahú iha 2016 to’o dezembru 2019 hamutuk 190. Hosi númeru ne’e na’in-40 hanesan profisionál sira-ne’ebé servisu iha Governu no na’in-150 hanesan jornalista.

Enkuantu, jornalista sira-ne’ebé iha ona melloramentu lian portugés hosi projetu CLJ iha 2016 to’o 2019 hamutuk na’in-211 no profisionál hosi instituisaun Governu hamutuk na’in-57.

Notísia Relevante: CEFTEC-CLJ realiza formasaun portugés faze daruak ba órgaun komunikasaun sosiál

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here