Sekretáriu Estadu Ambiente, Demétrio do Amaral de Carvalho. Imajen TATOLI/António Gonçalves

DILI, 14 jullu 2021 (TATOLI)-Sekretáriu Estadu Ambiente (SEA), Demétrio do Amaral de Carvalho, hateten, estabelesimentu brigada ambientál envolve joven ho movimentu voluntáriu atu sai defeza ambientál hodi kontrola  ambiente iha rai-laran.

“Brigada ambientál hanesan movimentu ida ne’ebé SEA hakarak harii filafali, ho espirítu voluntarizmu hanesan prosesu inísiu libertasaun nasionál, ne’ebé brigadista sira halo edukasaun popular no saúde popular,” Sekretáriu Estadu hateten ba Agência TATOLI, iha ninia knaar fatin, Bebora, kuarta ne’e.

Brigadista sei halo movimentu protesaun ba floresta, re-florestasaun nasionál, kombate ambientál urbana, kontrola ambiente hanesan sunu rai, soe lixu no atividade seluk ne’ebé bele estraga ambiente.

Tinan ne’e, SEA iha planu halibur brigadista 1.000-resin tanba haree ba kuantidade joven barak iha sosiedade atu proteje no salva guarda ambiente iha Timor-Leste.

“Ha’u sente kontente tanba tinan kotuk rekruta ona brigadista hamutuk 300 no tinan ne’e besik brigadista 150 ne’ebé envolve ona iha faze dahuluk no faze daruak sei avansa ho ema 160 atu atinje meta,” nia subliña.

Inisiativa estabelese brigadista ambientál atu hafanu filafali joven iha orgaizasaun no movimentu sira atu iha espíritu voluntarizmu hodi iha neon no hakarak salva, proteje no konserva ambiente.

Brigadista sira iha papél importante tebes atu kontinua fahe informasaun no formasaun ba sosiedade tomak atu tesi-ai, suni rai arbiru no seluk tan.

“Ita hakarak brigada sira bele halo asaun edukativu ba sosiedade atu  kuidadu tasi ibun, hamoos zona korridór tasi ninin, no reabilita korridór foho sira ne’ebé hale’u Dili laran atubele hasoru mudansa klimátika ou dezastre naturál,” nia hatutan.

Sei rekruta tan brigadista

SEA ho esperansa iha fulan-ikus tinan ne’e no tinan oin iha kondisaun atu rekruta tan brigadista barak liutan atubele halo asaun ho voluntáriu hodi sai protetór ba ambiente.

Dadaun ne’e brigadista hahú ona atividade hamoos tasi ninin, ne’ebé kada loron bele halibur lixu iha tasi ninin ezgotu no fatuk le’et sira kuaze tonelada ida to’o rua inklui hahú kuda ai-oan sira iha foho ninin iha tempu bailoron.

“Ha’u hanoin ne’e mensajen ba ita nia sosiedade, atu ema hotu tenke halo asaun salva ambiente tanba hosi asaun ne’e mak ambiente bele salva ita,” Sekretáriu Estadu ne’e fó hanoin.

Brigadista sira ne’e hosi  estudante universitáriu sira  no abitante sira iha balun ne’ebé idetifikadu risku ba dezastre naturál  iha kapitál Dili, ne’ebé simu ona formasaun hosi SEA, PERMATIL, Sekertariu Estadu Protesaun Sivíl (SEPS), Ministériu Agrikultura no Peska (MAP) liuhosi Diresaun Floresta no Ambiente tasi.

SEA mós koopera ho Autoridade lokál liuliu Xefe suku sira atu fó apoia ba atividade brigadista sira, maibé  iha ema balun halo reasaun hasoru brigadista sira tanba hakarak hamamuk tasi ibun sira atu sira okupa halo negósiu .

“Ha’u hakarak apela ba komunidade sira iha Dili laran katak ema ne’ebé halo reasaun hasoru brigadista sira ne’e konsidera hanesan krime ambientál ne’ebé sei prosesa tuir lei,” nia dehan.

Asaun Brigada Ambientál edukativu

Eis Deputadu ne’e afirma, Brigada Ambientál foku ba vantajen, inklui salva no proteje ambiente atu sai reziliente liu harosu alterasaun klimátika.

“Ha’u la haree ba dezvatajen, maibé haree ba vantanje katak sira (brigadista) nia asaun ne’e edukativu, fó mensajen ba ema hotu tenke sai inimigu ba ambiente ne’ebé la saudavél. Tanba brigadista sira iha fatin sia, kompostu hosi lima iha foho no haat iha tasi ibun,” nia dehan.

Programa Brigada Ambientál hetan apoia finanseiru hosi Banku Dezenvolvimentu Aziátiku (ADB, sigla inglés), Governu Japaun no Koreia inklui UNDP hamutuk millaun $1, atu fó serbisu imediata ba joven sira, ho kada loron $5 iha fatin ne’ebé identifikadu atu kuda ai no hamoos lixu.

Maibé, Tuir Sekretáriu Estadu ne’e, foku ba movimentu nia espíritu voluntarizmu, tanba sira servisu dader to’o lokraik, ne’ebé hola parte mós ba apoiu hosi UNDP nian.

“Ha’u la foku ba apoia United Nations Development Programme  (UNDP) nian, maibé foku ba serbisu ho espirítu voluntarizmu, ne’ebé sira hasai sira-nia osan rasik hodi halo plaka sira no organiza lojíztika,” nia apresia.

Nune’e, nia  fó mensajen ba sosiedade iha Dili laran atu koopera ho  Brigadista Ambientál tanba nu’udar movimentu ida ho resposabilidade atu proteje ambiente, halo ambiente sai forte no reziilente liu hasoru alterasaun klimátika.

“Ita-nia brigadista sira hanesan eroi foun iha prosesu konstrusaun Estadu no ba família sira hotu, tanba kualker asaun labele estraga sasán ne’ebé sira kuda no labele soe foer ne’ebé sira hamoos ona,” nia apela.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here