Ministru Transporte no Komunikasaun, José Agostinho da Silva no Prezidente ANC, João Olívio Freitas, hasai foto hamutuk ho empreza haat simu sertifikadu ISP, iha salaun ANC, kuarta (14/07). Imajen TATOLI/Natalino Costa

DILI, 14 jullu 2021 (TATOLI)—Ministériu Transporte no Komunikasaun (MTK) liuhosi Autoridade Nasionál Komunikasaun (ANC, sigla portugés) atribui sertifikadu Servisu Fornesimentu Internet (ISP-Internet Service Provider) ba empreza haat, nune’e bele hasa’e kualidade servisu ba públiku.

Empreza ne’ebé hetan legalizasaun servisu ne’e maka  Apurva Unipessoál LDA, Morapido Net. Unipessoál LDA, Elit Computer LDA no Megtelso S.A.

Iha ámbitu ne’e, Ministru Transporte no Komunikasaun, José Agostinho da Silva, husu ba empreza hirak ne’e atu kumpre promesa hodi fornese servisu liña internet ho kualidade di’ak.

“Husu ba empreza sira ne’ebé hetan ona sertifikadu ISP atubele kontribui di’ak liután, nune’e bele ajuda Governu liuhosi Ministériu Transporte Komunikasaun rezolve problema internet iha Timor-Leste,” Ministru José Agostinho, apela hafoin seremónia atribuisaun sertifikadu, iha salaun ANC, kuarta ne’e.

Notísia relevante: ANC atribui lisensa espektru frekuénsia adisionál ba operadór telekomunikasaun tolu

Tuir governante ne’e, nia parte no ekipa nafatin akompaña implementasaun servisu no empreza sira.

“Ha’u hakarak haree sira-nia implementasaun, karik sira la tuir kumpromisu, ita sei prosesa tuir baze legál dekretu-lei 15/2012,” nia subliña.

Ministru konsidera atribuisaun sertifikadu ISP nu’udar obrigasaun Governu atu fó oportunidade no promove empreza nasionál sira.

Iha fatin hanesan, Prezidente ANC, João Olívio Freitas, hateten, autoridade reguladór iha kompeténsia haat hanesan regulamentasaun, supervisaun, sansionatóriu  ka fó sansaun  no reprezenta Governu Timor-Leste iha rejionál no internasionál fó sansaun ba empreza karik viola regulamentu.

Nia dehan, kuandu empreza haat ne’ebé hetan sertifikadu ISP maka komete irregularidade ka viola kompromisu, tenke selu koima.

“Koima ne’ebé aplika 2% hanesan taxa regulatóriu ne’ebé maka operadór sira iha servisu setór komunikasaun tenke selu ba ANC, se la kumpre dever tuir dekretu-lei ne’e, maka autoridade iha kompeténsia fó sansaun,” nia fó hanoin.

Kona-ba sansionatóriu, daudaun autoridade halo ona prosesu administrasaun hasoru empreza rua ba servisu operadór telekomuniasaun ne’ebé durante ne’e viola regra.

Diretór Ezekutivu empreza Morapido Net,  Gregori Ferreira da Silva, komprometidu fornese liña internet di’ak ba públiku.

“Ita bele foti liña internet hosi li’ur, nune’e bele serbisu hamutuk ho operadór ISP lokál atubele fornese liña internet ho di’ak,” nia hatutan.

Liuhosi Dekretu-Lei Númeru 15/2012 loron 28 abríl, Governu harii ANC ho knaar atu regula telekomunikasaun, rádiu komunikasaun, radiudifuzaun, inklui internet hosi operadór fornesedór.

Nu’udar reguladór, ANC iha poder rekolla reseita hosi setór telekomunkasaun liuhosi jestaun rekursu rádiu-spektru, numerasaun (fixu, mobile, IP address, no domain name) inklui lisensa operasaun.

Nune’e mós, autoridade ne’e iha dever atu kontribui filafali ba komunidade iha setór dezenvolvimentu liuhosi Universal Service Obligation (USO).

Antes ne’e, ANC atribui ona sertifikadu rejistrasaun ISP ba empreza Gardamor, Metrolink, Global-net, Raph Vision  Unip.LDA no tuir planu sei fó tan ba empreza seluk ne’ebé halo servisu fornesimentu internet iha Timor-Leste.

Aleinde ne’e, atribui lisensa espektru frekuénsia adisionál ba operadór telekomunikasaun tolu ne’ebé opera iha Timor-Leste, hodi mellora asesu internet ba populasaun.

Atribuisaun espektru frekuénsia adisionál ba operadór sira iha banda 1.800 MHz, Timor Telecom hetan 10 MHz, Telemor 10 MHz no Telkomsel 10MHz.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here