Agrikultór-sira iha suku Raifun, halai natar ba faze daruak, kuarta (30/06/21). Imajen Tatoli/Sérgio da Cruz.

BOBONARO, 14 jullu 2021 (TATOLI)—Agrikultór-sira iha suku Goulolo, postu administrativu Cailaco, munisípiu Bobonaro, to’o ohin loron sei kontinua utiliza irrigasaun tradisionál hodi fornese bee ba natar.

Xefe Suku Goulolo, Tiago Laca-Mali konsidera situasaun ne’e kontinua difikulta prosesu produsaun hare, tanba irrigasaun tradisionál ladún fornese bee ba natar ho di’ak no sufisiente atu bele halai-natar dalarua kada tinan.

Notísia relevante:2021, suku tolu iha Bobonaro sei asesu eletrisidade

“Komunidade preokupa liu-liu irrigasaun, tanba sira halo tradosionál de’it. Entaun, iha tempu bailoron volume bee menus, labele halai-natar dalarua,” Tiago Laca-Mali  hateten ba jornalista Agência Tatoli, iha merkadu Maliana, kinta ne’e.

Komunidade iha suku ne’e maioria moris ho vida agrikultura no  badinas atu halai-natar, maibé iha époka daruak, obrigadu natar balun tenke abandonadu tanba irrigasaun tradisionál ne’ebé komunidade rasik halo labele fornese bee ho di’ak.

Autoridade lokal ne’e esplika, kada tinan agrikultór-sira kolleta hare iha époka daruak rezultadu produsaun sa’e makás, maibé presija konstrui mós irrigasaun, nune’e natar-sira balun ne’ebé abandonadu bele halai fila-fali.

Nia mós informa katak, prioridade hosi Programa Nasionál Dezenvolvimentu Suku (PNDS) iha tinan ne’e, komunidade deside atu konsentra hodi konstrui irrigasaun ba natar, nune’e bele motiva agrikultór-sira bele halai-natar.

“Bainhira ita konsege halo duni irrigasaun foun, ita sei benefisia natar ektare 300. Tamba agora bee mak menus, karik irrigasaun di’ak ema hotu-hotu hanoin atu halo de’it mak natar,” nia subliña.

Agrikultór, Frasisco Soares, hateten kada tinan produsaun aumenta maibé presija Governu fó formasaun ba agrikultór-sira, nune’e bele aumenta koñesimentu kona-bá produsaun hare ne’ebé di’ak.

Durante ne’e, agriktór-sira hetan apoiu tratór haat hosi Ministériu Agrikultura no Peska  (MAP), maibé la sufisiente, nune’e agrikultór baun tenki uza tratór privadu no aluga.

Suku Goulolo iha aldeia tolu mak haneasn Ilatbote ho populasaun 451 mai hosi uma-ka’in 125, aldeia Malilea ho populasaun 431 mai hosi xefe família 118 no aldeia Siriubu ho populasaun 573 mai hosi uma-kain 127, totál polulasaun iha suku ne’e hamutuk 1.445 ho totál uma-ka’in 370.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here