Logotipu FFTL no Bandeira RDTL. Imajen/FFTL

DILI, 13 jullu 2021 (TATOLI)–Treinadór prinsipál selesaun nasionál U-23, Fabio Joaquim Maciel da Silva, afirma nia ekipa jogadór-sira hosi U-23 preparadu no prontu enfrenta ekipa grupu H, hanesan Singapura, Filipina no Korea Sul iha jogu AFC U-23 iha Singapura.

“Buat hotu fila ba ita nia preparasaun, kontra ekipa mesak di’ak de’it, hanesan Singapura ekipa ne’ebé difisil hanesan mós uma-nain, Korea mós joga ida ne’ebé difisil hanesan mós Filipina, maibé futeból tenke joga lai iha kampu foin hatene rezultadu,” treinadór Brazileiru ne’e hateten bá Agência Tatoli iha kampu Federasaun Futeból Timor-Leste (FFTL), Dili, tersa ne’e.

Nia dehan, kalendáriu bá jogu AFC nian fó sai ona no Timor-Leste sei joga dala-tolu (3) iha loron lima (5) nia laran.

“Ida ne’e difisil tanba joga dala-tolu (3) iha loron lima (5), la’ós difisil ba Timor-Leste de’it, difisil mós ba sira seluk, hanesan Singapura, Filipina no Korea, tanba tempu lais liu iha rekuperasaun jogadór sira nian,” nia haktuir.

Iha sorin seluk jogadór ne’ebé treinu iha selesaun seniór, Anizio Correia hateten, hanesan treinadór nafatin kumpre saida mak treinadór fó hodi badinas treinu, atu nune’e, bele ba kompete iha jogu internasionál ne’e ho di’ak.

Tuir oráriu ne’ebé fó sai ona katak jogu sei hala’o outubru mai ne’e, Timor- Leste sei kontra uluk Singapura iha loron 27 outubru, joga da-ruak kontra Korea  iha loron 29 outubru no jogu da-toluk kontra Filipina iha loron 31 outubru.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here