Atendimentu ba resensiamentu eleitorál iha edifísiu STAE Viqueque. Imajen Tatoli/ Vitorino Lopes da Costa.

VIQUEQUE, 13 jullu 2021 (TATOLI)—Sekretariadu Tékniku Administrasaun Eleitorál (STAE), munisípiu Viqueque, konsege rejista ona eleitór foun no mós halo renovasaun ba eleitorál hamutuk na’in 95.

Rejistu ne’e hala’o iha serimónia lansamentu ba resensiamentu eletóral, iha 01 to’o 13 jullu 2021, iha postu Viqueque Villa, no oras-ne’e daudaun STAE destaka ona funsionáriu na’in-tolu iha kada postu administrativu.

Notísia relevante:PAA 2022, Viqueque sei propoin harii Ospitál Referál

“Maski ita lansa ona, maibé provizoriamente ita simu de’it eleitór iha Viqueque tanba mákina impresora ida de’it. Nune’e ita halo atendimentu ba eleitór ne’ebé urjente,” Diretór STAE, Humberto Fernandes, hateten ba jornalista Agência Tatoli, iha edifísiu STAE munisípiu Viqueque, tersa ne’e.

Oras-ne’e daudaun, funsionáriu STAE na’in-tolu ne’ebé destaka ona ba postu administrativu-sira kompleta ho ekipamentu lojístika, falta de’it mákina impressora mak seidauk distribui, tanba sei hein haruka mai hosi nasionál atu bele hahú halo serbisu.

Nia dehan, bainhira materiál-sira ne’e to’o ona, parte STAE ho Komisaun Nasionál ba Eleisaun (CNE sígla portugés) munisipál sei hato’o ba komunidade atu bele asesu ba resensiamentu eleitóral iha postu-sira.

Hosi númeru 95 ne’e, sira ne’ebé rejistu nu’udár eleitór foun hamutuk na’in 71 kompostu hosi feto na’in 31 no mane na’in 40, enkuantu sira ne’ebé halo renovasaun eleitóral hamutuk na’in 24 kompostu hosi feto na’in 13 no mane na’in 21.

Jornalista: Vitorino Lopes da Costa

Editór: Cipriano Colo

1 KOMENTÁRIU

HAKEREK NO HATÁN

Please enter your comment!
Please enter your name here