Planeamentu no dezeñu otél Hilton Dili Palms Sprigns. Imajen/Espesiál

DILI, 13 jullu 2021 (TATOLI)-Sekretaria Estadu Ambiente (SEA) no Ajénsia Nasionál Lisensimanetu Ambientál (ANLA) halo inspesaun ba konstrusaun otél Hilton Dili Palm Spring hodi finaliza avaliasaun ambientál atu atribui lisensa ho kategoria A iha fulan-augustu tinan ne’e.

Sekretáriu Estadu Ambiente (SEA), Demétrio do Amarál de Carvalho, hateten, otél ne’e marka boot ida  iha Timor-Leste.

“Ami simu ona dokumentu projetu no estabelese ona Komisaun nasionál avaliasaun impaktu ambientál atu avalia téknika hodi fó lisensamentu ambientál ba projetu ne’e,” Sekretáriu Estadu Demétrio hateten hafoin halo inspesaun iha otél, Fatuhada, tersa ne’e.

Atividade inspesaun ho objetivu empreza hotu ne’ebé hala’o konstrusaun iha Timor-Leste bele tuir prosedimentu jestaun ambientál hodi minimiza risku.

Otél Hilton Palm Spring iha klasifikasaun lisensa ambientál ho kategoria A ne’ebé aprezenta ona estudu no planu jestaun, nune’e Komisaun Avaliasaun Impaktu Ambientál mai halo inspesaun atubele deside hasai lisensa ambientál.

SEA espera prosedimentu ambientál ne’ebé sei aplika bele iha satisfasaun ba empreza no ba Timor-Leste.

“Ha’u mai vizita dala-tolu ona no kontente loos ho progresu serbisu ida-ne’e tanba otelaria ida ne’e atu hasa’e imajen Timor-Leste nian iha marka turizmu, ho padraun internasionál,” nia afirma.

Nune’e, Governu liuhosi SEA hakarak kongratula no  kontinua koopera hamutuk mellora investimentu sira hodi asegura ambiente iha rai-laran.

Otél Hilton ne’e harii ho andar sia, hahú konstrusaun iha tinan 2014 to’o outubru 2020 ne’ebé sei kompleta reziliénsia hasoru dezastre naturál hanesan rai-nakdoko, anin boot, iluminasaun kona-ba tempreatura, ár kondisionadu, jestaun bee no lixu inklui kombate inséndiu tuir hotu prinsipiu kombate mudansa klimátika iha Objetivu Dezenvolvimentu Sustentavél (ODS)

Iha biban hanesan, Prezidente ANLA, António Lelotasi, hatete daudaun ne’e Komisaun Avaliasaun Impaktu Ambientál (KAIA) halo ona avaliasaun dokumentu sira tanba tuir lei autoridade halo avaliasaun durante loron 50.

“Ita haree iha avaliasaun  dokumentu hosi Hilton Dili laiha dúvida ba membru komisaun, ha’u garante fulan oin ami bele atribui ona lisensa ambientál ho kategoria A,” Prezidente ANLA ne’e garante.

Diretór otél Hilton Dili Palms Sprigns, Jackson Lay, informa konstrusaun ne’e konsege paradu tanba pandemia globál no kontinua finaliza iha tinan ne’e nia rohan.

Konstrusaun ne’e sei kompletea mós kuadru 100-resin, karreta para fatin, ekipamentu komunikasaun no téknolojia, sala reuniaun, fatin hemu kafé no haan, GYM,  no seluk tan.

Enkuantu, traballadór ba konstrusaun otél ne’e timor-oan 85% no restu sidadaun estranjeiru.

Jornalista : Florêncio Miranda Ximenes

Editora     : Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here