Pesoál saúde serbisu hamutuk ho parte Forensik, prepara hodi transporta mate-isin fotógrafu profisionál, Guido Sam Martins, hosi rezidénsia Surikmas ba Ospitál Nasionál Guido Valadares. Imajen Tatoli/António Gonçalves.

DILI, 13 jullu 2021 (TATOLI)—Diretór Saúde Públika, Ministériu Saúde (MS), Carlito Coreia, hateten rezultadu teste swab COVID-19 ba mate-isin fotógrafu profisionál, Guido Sam Martins negativu.

“Ekipa pilár III ba foti swab iha nia-rezidénsia Surikmas iha tuku 8:00 no rezultadu fó-sai iha meiu dia negativu,” Carlito Coreia, hateten ba jornalista Agência Tatoli via WhatsApp, tersa ne’e.

Notísia relevante:PNTL-SIJK hein rezultadu teste médika ba mate-isin Guido Sam Martins

Nia dehan, rezultadu teste ne’ebé fó-sai ona hatudu katak negativu no daudaun-ne’e entrega ona ba parte Fornesik atu lori prosesu ne’e ba oin.

Antes ne’e, Segundu Komandante PNTL, munisípiu Dili, Superintendente João Belo Sanches, hateten iha segunda (12/07), tuku 22:00 otl, parte postu polísia Surikmas simu informasaun hosi família katak, fotógrafu profisionál, Guido Sam Martins hakotu-iis iha rezidénsia Surikmas, Dili.

Nune’e, komandu orienta kedan eskuadra Dom Aleixo liuhosi parte investigasaun ba kedan terrenu hodi koordena ho parte Forensik nasionál, hodi rekolla informasaun no konsege to’o iha faze teste swab COVID-19.

Tuir kompromisu, bainhira rezultadu hatudu katak mate la’ós tanba COVID-19, SIJK sei entrega fila-fali ba parte Forensik, hamutuk ho komandu munisípiu Dili atu koordena ho família hodi submete ba autopsia, nune’e bele loke investigasaun kle’an.

Informasaun ne’ebé parte polísia rekolla hosi terrenu katak, matebian hela mesak no hakotu-iis durante loron ha’at ka lima ona.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here