Segundu Komandante PNTL, munisípiu Dili, Superintendente, João Belo Sanches. Imajen Tatoli/Nelson de Sousa.

DILI, 13 jullu 2021 (TATOLI)—Polísia Nasionál Timor-Leste (PNTL), munisípiu Dili, detein suspeitu ZF ne’ebé deskonfia falsifika kartaun vasina COVID-19, atu sai hosi Dili ba munisípiu.

Segundu Komandante PNTL, munisípiu Dili, Superintendente, João Belo Sanches, hateten kazu ne’e akontese iha loron (10/07/21), bainhira suspeitu hosi Dili atu ba Ermera liuhosi pontu entrada Tasi-tolu mak polísia identifika halo falsifikasaun dokumentu, uza kartaun kinur vasinasaun ema seluk-nian.

Notísia relevante:PNTL detein joven na’in-rua falsifika dokumentu viazen

Nune’e, komandu orienta kedan eskuadra Dom Aleixo koordena ho seksaun investigasaun, hodi lori suspeitu submete ba investigasaun

“Daudaun-ne’e suspeitu iha hela sela detensaun hodi hein atu aprezenta ba Ministériu Públiku (MP) durante oras 72 atu submete ba primeiru interrogatóriu iha Tribunál,” João Belo Sanches, hateten ba jornalista-sira iha komandu Dili, tersa ne’e.

Nia dehan, polísia la tolera aktu krime falsifikasaun dokumentu ne’ebé lori kartaun hosi ema seluk no tenke prosesa tuir dalan legál.

Superintendente, João Belo Sanches, apela ba sidadaun hotu-hotu atu onestu bainhira kompleta ona vasina dala rua, lori mós ho kartaun eleitorál, nune’e aprezenta ba polísia iha pontu entrada bainhira sai hosi Dili.

Alende ne’e, ba sira ne’ebé foin vasina dala ida no seidauk vasina, husu atu aprezenta karta autorizasaun hosi Sentru Integradu Jestaun Krize.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here