Izolamentu Tasi-tolu. Imajen Tatoli/Maria Auxiliadora.

DILI, 13 jullu 2021 (TATOLI)—Polísia Nasionál Timor-Leste (PNTL), munisípiu Dili, husu pasiente-sira iha izolamentu atu kumpre regra prevensaun COVID-19, no evita kria disturbiu ne’ebé bele provoka  hamosu konflitu.

Segundu Komandante PNTL, munisípiu Dili, Superintendente João Belo Sanches husu ne’e, relasiona ho dezintendimentu ne’ebé akontese iha segunda (12/07) tuku 20:30 otl, entre pasiente iha izolamentu Tasi-tolu, ne’ebé espalla iha mídia sosiál.

Notísia relevante:Pozitivu COVID-19 halai hosi izolamentu ba hasoru doben

Superintendente, João Belo Sanches, esplika dezintendimentu ne’e mosu tanba pasiente ne’ebé iha hela izolamentu, lakohi simu sidadaun na’in-rua ne’ebé viajen hosi Indonézia atu tama tán iha izolamentu ne’e.

“Tuir loloos tenke simu tanba ema ida okupa mesak kuartu ida no halo tuir saida mak Governu prepara ona. Polísia sei la tolera bainhira hakilar-malu. Tanba ne’e, husu família sira iha izolamentu atu kumpre regra prevensaun ne’ebé iha atu labele akontese tan,” João Belo Sanches, hateten ba jornalista-sira iha komandu Dili, tersa ne’e.

Maski nune’e, nia dehan membru polísia ne’ebé destakadu iha izolamentu, komunika kedan ho parte Sentru Integradu Jestaun Krize (SIJK) ne’ebé konsege hakalma situasaun ne’e.

Tuir dadus hosi SIJK, dadaun-ne’e iha pasiente na’in 909 mak kumpre hela izolamentu ne’ebé Governu prepara.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here