DILI, 13 jullu 2021 (TATOLI)—Reprezentante povu iha uma fukun Parlamentu Nasionál, tersa ne’e aprova votu saudasaun ba aniversáriu Comunidade dos Países de Língua Portuguesa (CPLP) dala-25 (17 jullu 1996-17 jullu 2021) aprova mós votu kongratulasaun ba dezignasaun Zacarias Albano da Costa nu’udar Sekretáriu Ezekutivu ba organizasaun refere.

Notísia Relevante: Zacarias Albano agradese konfiansa nu’udar Sekretáriu Ezekutivu CPLP dezignadu Timor-Leste

Votu kongratulasaun ba dezignasaun Zacarias Albano da Costa nu’udar Sekretáriu Ezekutivu CPLP aprovadu ho rezultadu votasaun a-favór 53 no votu saudasaun ba aniversáriu CPLP nian aprovadu ho rezultadu votasaun a-favór 53.

“Votu kongratulasaun ba dezignasaun ba Zacarias Albano da Costa no votu saudasaun aniversáriu CPLP nian ba dala-25 pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Prezidente Parlamentu Nasionál, fó-sai katak Eis Ministru Negósiu Estranjeiru no Kooperasaun (MNEK) Zacarias Albano da Costa, ne’ebé dezigna nu’udar Sekretariu Ezekutivu CPLP sei formaliza iha 17 jullu.

Razaun Parlamentu Nasionál adianta kedas votu saudasaun no votu kongratulasaun tanba iha loron 14 jullu nu’udar loron ikus sesaun lejizlativa no semana oin funsiona de’it Komisaun Permanente nune’e deputadu sira tama ba períodu resesu.

Espesial.

Prezidente Grupu Nasionál Asembleia Parlamentár CPLP (AP-CPLP), Deputadu Francisco Miranda Branco, ne’ebé proponene ba votu kongratulasaun no saudasaun, fundamenta iha loron 17 jullu komunidade CPLP selebra aniversáriu ba dala-25.

“Ida-ne’e loron istóriku ida ba fundasaun CPLP ne’ebé Timor-Leste mós inklui iha laran, ne’e previleiju boot ba ita, ita-nia Timor-oan ida Zacarias Albano da Costa nu’udar diplomata ida, hetan fiar sai Sekretáriu Ezekutivu CPLP nian. Nia sei halo afirmasaun ba língua portugés mais determinante iha mundu,” Xefe Bankada FRETILIN ne’e hateten.

Deputadu Branco fiar katak Zacarias Albano da Costa iha opurtunidade atu divulga saida mak Timor-Leste hakarak iha komunidade ida-ne’e nia laran.

“Intermu ekonomia, komunidade CPLP bele kontribui ba nível mundiál. Ne’e ita-nia orgullu ida tanba primeira-vez sidadaun Timor-Leste simu kna’ar nu’udar Sekretáriu Ezekutivu CPLP,” nia dehan.

Purtantu membru AP-CPLP, Deputada Maria Fernnada Lay, konsidera 17 jullu nu’udar loron istóriku ba membru CPLP tomak.

“Ha’u lamenta ho situasaun ida-ne’e, tanba ita promove patrimóniu komún língua portugueza, maibé ita la uza iha Parlamentu Nasionál ida-ne’e, oinsá mak ita atu fomenta ita-nia partisipasaun,” nia fó hanoin.

Hatán ba preokupasaun ne’e, Prezidente Parlamentu Nasionál, fó-sai katak iha ona rezolusaun ida katak kada fulan plenária tenke uza língua portugéza maibé deputadu sira mak la uza halo didi’ak,” nia hateten.

Notísia Relevante: Zacarias Albano sei simu pose iha Angola

Zacarias Albano hala’o servisu tuir estatutu Sekretáriu Ezekutivu CPLP

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here