Diálogu nasionál konsultasaun seguransa ai-han iha Timor-Leste, iha City 8, Manleuana, tersa (13/07). Imajen TATOLI/Francisco Sony

DILI, 13 jullu 2021 (TATOLI)—Reprezentante Organizasaun Nasaun Unida (ONU) iha Timor-Leste, Roy Trivedy, konsidera importasaun ai-han a’as iha Timor-Leste, tanba ne’e presiza buka mekanizmu hodi hadi’a produsaun rai-laran.

“Daudaun ne’e Timor-Leste importa ai-han 60%, entaun presiza iha ideia atu mellora no fortaliza produsaun ai-han atu redús importasaun hodi kontribui ba nutrisaun di’ak povu. Realmente, dezafiu ne’ebé Timor-Leste hasoru mak oinsá atu mellora produsaun no distribuisaun,” Reprezentante ONU relata iha ámbitu diálogu nasionál simeira sistema ai-han iha salaun otél City 8, Manleuana, tersa ne’e.

Reprezentante ONU iha Timor-Leste, Roy Trivedy. Imajen TATOLI/Francisco Sony

Nune’e mós, nia konsidera atu hadi’a produsaun no seguransa ai-han, área teknolojia sai mós fatór importante tanba presiza informasaun kona-ba presu ai-han.

Nia propoin ba Governu atu realiza atividade barak hodi tau ideia hamutuk hodi buka solusaun ba hamlaha no produsaun ai-han.

“Diálogu nasionál simeira sistema ai-han importante tebes tanba Timor-Leste hasoru problema produsaun no seguransa ai-han tanba ema barak hasoru problema nutrisaun la sufisiente,” nia akresenta.

Notísia relevante: GASC-MS realiza diálogu nasionál konsultasaun seguransa ai-han

Tinan 2021 nia rohan sei realiza reuniaun kona-ba seguransa alimentár no nutrisaun, ne’ebé Timor-Leste mós sei partisipa iha reuniaun ne’e tanba bázikamente iha ona ideia atu kontribui iha nível globál inklui bele aprende teknolojia no ideia foun hodi kontribui mellora produsaun ai-han iha rai-laran.

Reprezentante ONU komprometidu ajuda Governu realiza diálogu hodi prepara didi’ak hanoin sira hodi fahe iha simeira nível mundiál, tanba diálogu dahuluk atu kontribui idea, teknolojia no fahe informasaun ba ema seluk.

Roy Trivedy nota katak populasaun globál aumenta halo sistema ai-han mak xave importante atu responde ba problema ai-han mundiál.

“Mudansa klimátika iha impaktu boot ba sistema ai-han mundiál. Ohin loron iha populasaun hamutuk millaun 850 iha mundu mak laiha ai-han ka hamlaha, tanba ne’e Sekretáriu Jerál ONU no membru nasaun sira deside tinan ne’e realiza eventu barak atu ko’alia kona-ba oinsá mak ita bele iha sustentabilidade ai-han iha futuru,” nia hatutan.

Simeira mundiál ho tema ‘Food System Pre-Sumit’ sei realiza iha loron 26-28 jullu 2021 iha Roma no atividade nível mundiál hodi ko’alia kona-ba nutrisaun ai-han sei realiza iha tinan ne’e nia rohan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here