Sekretariu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

DILI, 13 jullu 2021 ( TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’ observa formasaun iha Sentru Formasaun Téknika iha Komunikasaun (CEFTEC sigla oortugés) ne’ebé reativa ona formasaun ba formandu hamutuk 220, ne’ebé fahe ba unidade neen.

Iha biban ne’e, nia enkoraja formandu sira hodi aproveita oportunidade ho di’ak tanba formasaun ema barak mak hakarak hetan oportunidade ne’e maibé balun de’it mak hetan tanba espasu la sufisiente atu akumula ema barak.

“Ema hakarak mai ne’e barak ho númeru boot, maibé tanba espasu naton, entaun ita tenke halo selesaun no haree kritériu balun atu fó ba ema ne’ebé mak iha duni interese no vontade, ne’ebé ita konsege hetan númeru tuir kondisaun, nune’e ha’u husu ba formadu sira atu aproveita oportunidade ne’e ho di’ak,” Sekretáriu Estadu Akara hateten iha fatin formasaun iha Acait, tersa ne’e.

Biban ne’e, governante ne’e fó hanoin mós ba formandu no formadór hodi nafatin kumpre regra sanitária.

“Kuaze tempu naruk ita enfrenta pandemia, entaun ita-nia formasaun la la’o, nune’e ohin ha’u asegura katak formasaun tenke funsiona fali maibé importante mak kumpre regra hosi Organizaun Mundiál Saúde (OMS), nune’e ohin ha’u haree buat hotu la’o ho di’ak,” nia akresenta.

Iha fatin hanesan, Koordenadór interinu CEFTEC, Rafael da Silva Freitas, hateten, bazeia ba planu hakarak atinje formasaun to’o iha nível haat, maibé tanba relasiona ho pandemia mak sei koko atu atinje to’o nível rua.

Antes ne’e, ema ne’ebé rejistu atu tuir formasaun ne’e hamutuk 575, maibé hafoin selesaun 220 mak liu.

Enkuantu, unidade formasaun ne’ebé daudaun ne’e reativa mak lian tetun jornalizmu, komunikasaun lian portugés jornalizmu, komunikasaun relasaun públika no Protokolu, hakerek imprensa, rádiu no komunikasaun iha situasaun krize.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here