Progressu hosi projetu konstrusaun edifísiu postu administrativu Uatulari. Imajen Tatoli/ Vitorino Lopes da Costa.

VIQUEQUE, 13 jullu 2021 (TATOLI)—Diretór Planu Investimentu Dezenvolvimentu Munisipál (PIDM) Viqueque, Domingos de Carvalho Monteiro, fó ona ultimatum ba kompañia Lemadae ne’ebé seidauk konklui konstrusaun edifísiu postu administrativu Uatulari, maski kontratu remata ona.

Domingos de Carvalho Monteiro fó ultimatum ba kompañia atu serbisu ho lalais hodi bele entrega obra ne’e iha 12 agostu, tanba tuir akordu inísiu konkorda katak, tenke entrega iha 1 jullu.

Notísia relevante:Médiku espesialista sei hala’o tratamentu saúde iha Viqueque

“Ohin segunda 12 jullu 2021 kompañia submete planu serbisu foun no karta deklarasaun ida kona-bá fó garantia serbisu mai PIDM  ne’ebé tenke finaliza 100% iha 12 agostu 2021. Projetu ne’e ita haree la’o tinan rua ona, maibé seidauk finaliza. Ne’e loloos hotu iha fulan neen nian-laran, la’ós to’o fali agora,” Domingos de Carvalho Monteiro, hateten ba jornalista Agência Tatoli, iha administasaun munisípiu Viqueque, tersa ne’e.

Projetu konstrusaun edifísiu ne’e hahú iha 2019, nune’e 29 juñu 2021 bainhira parte PIDM halo monitorizasaun, konstrusaun ne’e la’o neineik loos.

Ho situasaun ne’e maka, PIDM halo fali karta xamada atensaun dala ida tan, foin iha 9 jullu 2021 kompañia Lemadae haruka reprezentante mai hasoru administradór munisípiu Viqueque no PIDM halo justifikasaun no asina deklarasaun ba data finalizasaun  ne’ebé  deside katak, projetu konstrusaun ne’e sei remata iha 12 agustu 2021.

Nia dehan, bainhira to’o 12 agostu maka seidauk finaliza, tenke hapara kompañia hosi projetu ne’e bazeia ba aprovizionamentu serbisu.

Iha fatin seluk, reprezentante kompañia Lemadae, Iman Munawir, hateten konstrusaun edifísiu ne’e seidauk atinji 71% tanba impaktu hosi COVID-19, susar atu sosa materiál hosi Dili mai postu administrativu.

Nune’e mós Administradór Postu Administrativu Uatulari, Tomas Soares da Silva, haktuir konstrusaun edifísiu postu administrativu Uatulari hela serbisu oitoan maka kompañia presija kompleta.

“Ha’u haree konstrusaun ne’e hela oitoan de’it mak kompañia presija kompleta tán mak hanesan, moru hela  metru 40 maibé serbisu sei la’o nafatin atu kompleta,” Tomas Soares da Silva hateten.

Projetu konstrusaun edifísiu postu administrativu Uatulari hosi Ministériu Administrasaun Estatál (MAE), ho montante orsamnetu $518.411,79.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here