Eis Prezidente Repúblika, José Ramos Horta, haree hela uma ne'ebé FKHTL konstrui ba oan-kiak na’in-rua iha Aldeia, Naroman Suku Madohi, Postu Administrativu Don Aleixo, Munisípiu Dili, tersa (13/07/2021). Imajen Tatoli/Arminda Fonseca

DILI, 13 jullu 2021 (TATOLI)-Eis Prezidente Repúblika, José Manuel Ramos Horta, tersa ne’e, hala’o vizita bá grupu Forum Karidade Umanitária Timor-Leste (FKHTL) ne’ebé ho voluntáriu konstrui  uma bá oan-kiak na’in-rua iha Aldeia, Naroman Suku Madohi, Postu Administrativu Don Aleixo, Munisípiu Dili.

Notísia Relevante : FKHTL halo uma ba oan-kiak na’in-rua iha Madohi

Laureadu Nobel ba Paz nian iha tinan 1996 ne’e klarifika katak  objetivu hosi vizita ida-ne’e tanba antes ne’e grupu FKHTL rasik hasoru nia hato’o ezisténsia FKHTL nian no mós hato’o atividade ne’ebé durante ne’e FHKTL rasik halo ona.

“Ha’u-nia vizita ida-ne’e hakarak mai haree diretamente atividade asaun karidade ne’ebé grupu FKHTL ho inisiativa rasik halo uma ba ita-nia oan-kiak na’in-rua ne’ebé presiza tebes sira-nia ajuda, maske servisu ho voluntáriu de’it maibé sira konsege halo uma bá maluk sira ne’ebé presiza tulun, entaun ha’u haree sira-nia esforsu hakarak felisita ka fó parabens ba sira tanba uma ne’ebé sira halo kualidade tebes,” Ramos Horta hateten hodi responde Agência Tatoli iha Madohi, Dili, tersa ne’e.

Tuir Ramos Horta, servisu ne’ebé grupu FKHTL halo di’ak tebes  tanba ida-ne’e hatudu katak servisu la presiza hein ajuda hosi Governu ka  embaixadór ruma mak foin book aan.

Nia hatutan, servisu voluntáriu ne’e valór ne’ebé boot tanba ne’e la presiza hein ema ruma fó osan mak foin halo buat ruma, maibé dalan FKHTL hatudu daudaun, maske antes ne’e, servisu ho voluntáriu, maibé bainhira halo servisu ne’ebé di’ak ho komunidade fiar katak Governu rasik sei ajuda sira nune’e bele ajuda liután sira-nia atividade voluntáriu.

Iha biban ne’e mós nia apela ba grupu FKHTL ba oin kontinua nafatin inisiativa voluntáriu ne’ebé daudaun halo uma nafatin matenek ne’ebé iha.

Nune’e nia mós ba joven sira hotu iha tempu agora tenke badinas estuda, tanba bainhira sei joven oportunidade mak estuda.

Prezidente Forum Karidade Umanitária Timor-Leste, Miguel da Silva, agradese tebes ba prezensa eis Prezidente José Ramos Horta tanba durante ezisténsia FKHTL foin dahuluk hetan vizita hosi lideransa nasionál ida.

“Ami kontente no ondradu tebes tanba nia bele mai vizita ami no vizita ida ne’e bazeia ba antes ne’e ami ba hasoru nia iha nia gabinete Farol, Dili,” Miguel da Silva hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here