Membru PNTL hosi Diresaun Nasionál Tránzitu no Seguransa Rodoviária (DNTSR), hala’o pasa revista no halo apreensaun ba motór ne’ebé laiha dokumentu, iha Palásiu Governu oin, kuarta (26/05/21). Imajen Tatoli/António Gonçalves.

DILI, 13 jullu 2021 (TATOLI)—Fulan juñu-jullu,  Polísia Nasionál Timor-Leste (PNTL), munisípiu Dili, liuhosi Unidade Seksaun Tránzitu Rodaviáriu, konsege rekolla  $28.316 ba kofre Estadu.

Reseita ne’e, rekolla hosi atividade operasaun momentu iha jogu kopa Euro, konsege halo apreensaun ba transporte nu’udár evidénsia hosi infratór hamutuk 969, tanba viola lei kódigu estrada númeru 6/2003, loron 3 abríl, hanesan laiha xapa matríkula, dokumentu inválidu no seluk tan.

Notísia relevante:Maiu, PNTL Dili rekolla $11.928 ba kofre Estadu

“Juñu reseita $23.529 no jullu to’o iha semana kotuk, konsege rekolla tán $4.787,” Komandante Unidade Tránzitu Dili, Inspetór, Domingos Sarmento Gama, hateten ba jornalista-sira iha komandu PNTL Caicoli, tersa ne’e.

Domingos Sarmento Gama subliña, polísia sei la tolera kulakér sidadaun viola lei, tanba ne’e sei kontinua halo operasaun hodi fó edukasaun sívika ba komunidade ne’ebé kondúz transporte privadu ka Estadu tenke kumpre lei.

Ema na’in rua mate

Durante fulan juñu-jullu,  PNTL munisípiu Dili, liuhosi Unidade Seksaun Tránzitu Rodoviáriu, rejista ema na’in-rua mak hakotu-iis tanba asidente tráfegu.

Inspetór, Domingos Sarmento Gama, hateten juñu ne’e rejiza kazu 54 kompostu kazu mate ida, kanek todan lima, kanek kaman 39 la kanek na’in 9, no hosi 01 jullu to’o ohin  rejista kazu 15, ne’ebe iha kazu mate ida, kanek todan tolu, kaman 11.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here