Buibere FC sai kampiaun Tasa Rosa "Muki" Bonaparte 2020. Imajen/FFTL

DILI, 13 jullu 2021 (TATOLI) – Prezidente klube feminina FC Buibere, Lelia Martins, afirma sira-nia parte prepara ona atu kompete iha Liga Feto Timor (LFT) ne’ebé sei hala’o agostu mai ne’e hodi mantein sira-nia títulu kampiaun.

Notísia Relevante : Buibere kampiaun tasa Rosa “Muki” Bonaparte

“Ami prepara hela, jogadora sira komesa treinu ona, jogadora nafatin mantein hanesan tinan kotuk, ne’ebé ami preparadu hodi kompete iha jogu mai ne’e,” Lelia Martins hateten bá Agência Tatoli iha kampu Federasaun Futeból Timor-Leste (FFTL), Dili, tersa ne’e.

Jogadora iha FC Buibere hamutuk na’in-27, maibé foin lalais iha mudansa ba jogadora tanba jogadora anteriór balun sai ona ba klube seluk no jogadora foun balu hosi SLB ho S’Amuser daudauk ne’e hamutuk fali ho Buibere.

Iha sorin seluk, jogadora Buibere, Natacia Jaquelina Silva Carmo hatete, difisil ba sira atu mantein títulu kampiaun, maibé mós la fasil ba klube seluk atu hadau títulu kampiaun.

“Hanesan jogadora ami-nia devér mak tenke treinu nafatin. Maibé hosi pandemia global ne’e ami paradu tiha durante fulan tolu, agora foin hahú fali treinu,” nia hateten.

Jogadór Buibere kada loron sempre hala’o treinamentu iha kampu Palapaço, Dili, iha oras loraik no dadeer.

FC Buibere hanesan klube feminina ida ne’ebé da-uluk sai kampionatu ba LFT iha époka 2020 no sai mós kampiaun ba tasa Rosa Muki Bonaparte iha épka ne’ebé hanesan.

Jornalista       : Hortencio Sanchez

Editór              : Francisco Simões

HAKEREK NO HATÁN

Please enter your comment!
Please enter your name here