Kondisaun uma iha área Ponte Comoro 3, Dili, ne’ebé hetan estragu hosi inundasaun ne’ebé akontese domingu (04/04/2021). Imajen TATOLI/António Gonçalves.

DILI, 13 jullu 2021 (TATOLI)-Ekipa task force hosi liña ministeriál kompostu hosi Ministériu Obra Públika (MOP), Ministériu Planu no Ordenamentu (MPO), kontinua planifika projetu reabilitasaun estruturál simple no komplexa ne’ebé hetan estragu kauza dezastre naturál iha loron 04 abríl.

“Ministériu Obra Públika nia área barak liu mak hetan estragu ba infraestrutura ho estruturál simple iha hela faze planifikasaun atu ba halo mitigasaun, hafoin  Ajénsia Dezenvolvimentu Nasionál (ADN) no Komisaun Administrasaun Fundu Infraestrutura (KAFI) deside mak Komisaun Nasionál Aprovizionamentu (CNA) anúnsia konkursu hanoin halo rekuperasaun,” Ministru Obra Publika,  Salvador Eugênio Soares dos Reis Pires, informa, iha salaun Hotel Novo Turismo, Bidau Licidere, tersa ne’e.

Ekipa koopera ho Ministériu Administrasaun no Estatál (MAE) inklui autoridade lokál inklui Obra Públika no Estatál munisipál halo ona idetifikasaun estragu infraestrutura kauza dezastre naturál iha territóriu tomak iha lokál 101 ho kustu estimasaun millaun $245.

Estragu infraestrutura ne’e ba verba estrada no ponte hamutuk 101, fahe ba komponente rua hanesan infraestrutura simples hamutuk 57 ne’ebé klasifikasaun hosi kustu inferiór millaun $1 no projetu reabilitasaun estruturál komplexa hamutuk 44 ho kustu estimadu boot-liu millaun $1.

Governante ne’e esplika klasifikasaun simples tanba estrada no ponte balun rai monu iha sorin de’it, ne’ebé bele halo planifikasaun atu rekupera ka aterru rai, enkuantu klasifikasaun komplexa tanba hetan estragu totál ne’ebé presiza halo estudu no planifika hodi rekupera.

“Ami-nia ekipa tarefa halo hela planifikasaun aumezmu tempu ami mós halo rekrutamentu ba enjeñeiru sira atu hamutuk ho enjeñeiru Universidade Nacional Timor-Leste (UNTL) halo planifikasaun atu aprezenta, hafoin  ekipa tarefa lori KAFI atu aprova no CNA loke konkursu avansa ba rekuperasaun,”nia hatutan.

Kona-ba projetu rekupera estragu imediatu iha área hitu, ekipa hosi ministériu relevante sira finaliza ona dezeñu no Bill of Quantity (BOQ) atu rekupera imediata estrada no ponte, ne’ebé CNA hahú prosesa aprovizionamentu atubele rekupera imediata.

“Projetu ne’ebé ualu ne’ebé KAFI deside rekupera imediata, maibé ida iha embaixada Japaun nia oin finaliza ona no projetu haat inklui tolu seluk iha prosesu konkursu públiku iha CNA hafoin bele halo rekuperasaun,” nia hatutan.

Projetu sira iha área hitu kompostu ponte no estrada bá Maloa, estrada Ailok-Laran bá RTK, estrada iha Hospital Nasional Guido Valadares (HNGV) nia kotuk no estrada ne’ebé kotu iha diresaun Tibár bá Ermera, esrada iha ponte CPLP bá Bebonuk no Ponte Becusse.

Tuir kálkulu, orsamentu ba rekuperasaun obra iha fatin hotu ho kategoria imediata, ho kustu millaun $5.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here