Grupu GMPTL. Imajen/Media PN.

DILI, 13 jullu (TATOLI)—Deputada Lídia Norberta dos Santos Martins, re-eleita nu’udar Prezidente Grupu Feto Parlamentár Timor-Leste (GMPTL-sigla portugés) ba períodu 2021-2023, liuhosi prosesu eleisaun ne’ebé demokrátiku ne’ebé lista A mak manán ho rezultadu votasaun 13 no lista B votu 12.

Kompozisaun meza GMPTL kompostu hosi depuada Lídia Norberta dos Santos Martins nu’udar prezidente, deputada Domingas dos Santos nu’udar vise-prezidente no deputada Elvina Sousa de Carvalho nu’udar sekretária meza GMPTL.

Prezidente GMPTL, Deputada Lídia Norberta dos Santos Martins, fó-sai katak mandatu anteriór hotu ona no presiza liuhosi eleisaun hodi hili estrutura no hili nia hodi kontinua mandatu to’o 2023.

Notísia Relevante: GMPTL-PLAN asina akordu kombate dezigualdade hasoru  feto-labarik feto

“Ha’u kontinua mandatu ida-ne’e lidera GMPTL to’o 2023. Ami sei hala’o nafatin serbisu pendente sira-ne’ebé la konsege halo mak hanesan lei traballu doméstika, ami sei esforsu oinsá ratifika konvensaun ema ho defisiénsia no halo advokasia ba feto maluk sira-ne’ebé hasoru situasaun vulnerável,” Prezidente GMPTL informa ba Agência TATOLI, iha Parlamentu Nasionál, tersa ne’e.

Durante mandatu anterior, nia dehan, konsege ultrapasa kona-ba importánsia hosi ema ho defisiénsia katak oinsá mak asegura kontrusaun edifísiu sira, nune’e bele loke asesu ba ema ho defisiénsia.

Grupu GMPTL. Imajen/Media PN.

“Ida-ne’e konsege hetan rezultadu. Agora projetu sira hosi Ministériu Obra Públika tenke tau konsiderasaun ba ema ho defisiénsia, nune’e mós ita-nia maluk defisiénsia sira barak mak presiza tebes atu asesu ba informasaun entaun liuhosi televizaun ita konsege tanba aprezenta ema ida hodi hatudu ’lian jestuál’ ne’e atu ema defisiénsia tilun sira bele komprende,” nia hateten.

Oras ne’e, GMPTL luta hela nune’e ema ho defisiénsia sira bele hetan sertifikadu bele hetan de’it Timor-Leste, la presiza ba to’o iha Indonézia.

Entretantu Vise-Prezidente GMPTL foun, Deputada Domingas dos Santos, fó-sai katak meza foun sei reune hamutuk hodi hala’o reuniaun ho parseiru sira iha tempu badak.

“Ami sei halo avaliasaun badak kona-ba atividade ne’ebé mak durante períodu liubá halo ona, no atividade seidauk halo ne’e tanba saida. Depois, ami sei trasa planu foun,” Deputada Bankada PLP ne’e hateten.

Xefe Bankada Kmanek Haburas Unidade Nacional Timor Oan (KHUNTO), Deputada Olinda Guterres orgullu ho prosesu eleisaun ne’e tanba deputadu bankada opozisaun mós partisipa hodi hili meza foun ne’e.

“Ami feto parlamentár sólidu tebes no ami re-eleita ami-nia prezidente GMPTL, vise-prezidente no sekretária meza. Ita bele ideia ketak-ketak iha plenária maibé kuandu sai mai li’ur, ita unidu nafatin,” Deputada Olinda Guterres hateten.

Antes eleisaun, iha aprezentasaun kandidatura ne’e, iha lista A no lista B. Lista A kompostu depuada Lídia Norberta dos Santos Martins (prezidente) hosi bankada FRETILIN, deputada Domingas dos Santos (vise-prezidente) hosi bankada Partidu Libertasaun Populár (PLP) no deputada Elvina Sousa de Carvalho (sekretária meza) hosi bankada Partidu Demokrátiku (PD).

Lista B kompostu hosi Deputada Isabel Ximenes (prezidente) hosi bankada Frente-Mudança (FM), deputada Domingas dos Santos (vise-prezidente) hosi bankada Partidu Libertasaun Populár (PLP) no deputada Elvina Sousa de Carvalho (sekretária meza) hosi bankada Partidu Demokrátiku (PD).

Notísia Relevante: GMPTL esforsu finaliza rezolusaun parlamentár kontra asédiu sexuál

Jornalista : Evaristo Soares Martins

Editór       : Cancio Ximenes   

HAKEREK NO HATÁN

Please enter your comment!
Please enter your name here