Autoridade RAEOA ho Organizasaun Naun Guvernamentál FPWO, selebra Memorandum of Understanding (MoU). Imajen/Mídia RAEOA-ZEESM.

OÉ-CUSSE, 13 jullu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA) ho Organizasaun Naun Guvernamentál (ONG) Forum Peduli Wanita Oé-Cusse (FPWO), selebra memorandu entendementu (Memorandum of Understanding, MoU) hodi fó apoiu montante $7.600  atu kombate violénsia doméstika iha Oé-Cusse.

Prezidente Autoridade RAEOA, Arsénio Paixão Bano, hateten ho selebrasaun MoU ne’e bele tulun feto Oé-Cusse-oan sira-nia problema no hein implementasaun planu estratejiku no servisu regulár ba fulan neen (6) nian, molok halo estensaun ba selebrasaun ne’e.

Autoridade RAEOA ho Organizasaun Naun Guvernamentál FPWO, selebra Memorandum of Understanding (MoU). Imajen/Mídia RAEOA-ZEESM.

“Ha’u haree, sira-nia ekipa mesak badinas no matenek no kompetente de’it. Ha’u fiar ho apoiu ne’e sei servisu maka’as liután ba Oé-Cusse. Ida-ne’e mak ha’u hein. Servisu Sekretáriu Edukasaun no Solidariedade Sosiál sei koordena ho sira tanba ita-nia objetivu ne’e hamenus no kombate problema violénsia domestika iha Oé-Cusse,” Prezidente Autoridade RAEOA informa ba Agência Tatoli iha nia kna’ar fatin, edifisiu ZEESM Oé-Cusse, tersa ne’e.

Autoridade fó apoiu ba FPWO tanba tinan barak sira halo servisu apoiu ba feto sira iha Oé-Cusse, tanba iha RAEOA ne’e problema barak ho violénsia doméstika entaun presiza halo parseiru ho FPWO atu kombate violénsia doméstika iha Oé-Cusse.

Iha tinan balun, ONG ne’e hetan problema servisu kona-ba apoiu entaun autoridade hamutuk ho Sekretáriu Rejionál Asuntu Edukasaun no Solidariedade Sosiál deside atu fó tulun, nune’e sira bele funsiona fali no bele hala’o servisu importante ba feto sira iha Oé-Cusse.

Entretantu Diretóra Forum Peduli Wanita Oé-Cusse (FPWO), Filomena Sila, agradese ba apoiu hosi Autoridade RAE0A no ho apoiu ne’e nia parte promete sei hala’o planu estratejiku ba sosiedade tomak.

Molok hakat ba iha faze selebrasaun MoU ne’e, FPWO konsege observa no atende problema prinsipál sira hanesan inan feto no labarik feto sira barak mak hetan problema violénsia doméstika no hetan abuzu seksuál.

“Ami-nia kompromisu, ami nafatin apoiu maluk feto sira nomós labarik feto sira. Atu nune’e, sira bele hatene katak bainhira hetan problema sira hanesan ne’e, sira iha mentalidade di’ak, iha forsa no brani, nune’e bele hato’o sira-nia keixa ba FPWO. Ho keixa sira ne’e, bele hamenus problema iha Oé-Cusse,” nia haktuir.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here