Administradór Postu Administrativu Don Aleixo, Tomas Barros. Imajen Tatoli/Domingos Piedade Freitas.

DILI, 13 jullu 2021 (TATOLI)—Administradór Postu Administrativu Dom ALeixo, Tomas Barros, husu Prezidente Autoridade Munisípiu foun ne’ebé atu lidera Munisípiu Dili presiza kolabora ho autoridade lokál sira atu serví povu no kontribui ba dezenvolvimentu nasaun ne’e nian.

Notísia Relevante: MAE sei aprezenta PAM Dili na’in-haat nia naran ba KM

“Ami prontu halo kolobarasaun nafatin ho Prezidente Autoridade Munisípiu Dili foun ne’ebé sei mai, maibé ami hakarak ita tenke halo liña koordensaun di’ak ho ita-nia autoridade lokál sira hotu iha Postu ida nia-laran, nune’e ita bele servi ita-nia povu no kontribui ba dezenvolvimentu nasaun ne’e nian,” Tomas Barros hateten ba Agência TATOLI, liuhosi telefónika, tersa ne’e.

Nia rekomenda, PAM presiza koopera ho parte hotu-hotu hanesan seguransa, saneamentu, saúde, no seluk tán atu atu bele asegura no garante estabilidade no sisiedade ne’ebé saudavel.

“Ha’u rekomenda no husu atu PAM Dili foun ne’e halo kooperasaun ba parte seguransa, nune’e bele asegura estabiliade iha ita-nia postu rasik. Tanba dala barak konflitu entre joven akontese hela de’it, entaun PAM foun ne’e tenke servisu hamutuk ho seguransa para bainhira akontese buat ruma ita bele asegura,” nia dehan.

Iha situasaun pandemia COVID-19 ne’e, nia husu ba PAM foun tenke hola inisiativa hodi servisu hamutuk ho parte saúde hodi halo promosaun no prevensaun ba moras aat ne’e iha aldeia no suku sira. 

Nune’e mós hamatan ba saneamentu, bee-moos, eletresidade, estrada mós importante tanba ne’e presiza tau atensaun, nune’e povu labele halerik to’o iha nasionál.

Entretantu Xefe Suku Caicoli, Postu Administrativu Vera Crúz, Munisípiu Dili, Hipólito Marques Sarmento hateten PAM Dili foun tenke aten-barani no fuan-boot hodi hamutuk ho autoridade lokál sira atua no rezolve konflitu iha sidade Dili, tanba kesatun boot ne’e povu enfrenta mak konflitu entre joven sira.

“Ba Prezidente Autoridade Munisípiu Dili ne’ebé foun, ha’u rekomenda ba Governu tenke iha ema-ne’ebé ho fuan boot no esperiénsia atu servisu hamutuk ho ami hodi lidera ita-nia povu no haree infraestrutura iha Dili ne’e ho di’ak liután. Tanba, Dili ita haree hanesan fatin konflitu ba joven sira,” nia dehan.

Prezidente Autoridade Munisípiu (PAM) Dili foun ne’ebé atu mai ne’e presiza servisu hamutuk ho autoridade komunitária sira, nune’e bele lori dezenvolvimentu no povu iha kapitál Dili ne’e ba futuru ida-ne’ebé di’ak no armónia.

PAM Dili presiza koopera no halo kolaborasaun, nune’e bele hamutuk atende situasaun saida de’it mak akontese iha sidade Dili nia laran.

Notísia Relevante: Jullu, MAE sei submete relatóriu rekrutamentu kandidatu PAM Dili ba KM

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here