Tékniku EDTL halo instalasaun eletrisidade iha área Comoro, Dili, kinta (04/04). Imajen TATOLI/António Gonçalves

DILI, 12 jullu 2021 (TATOLI)-Administradór Postu Administrativu Laulara, Munisípiu Aileu, Isaias Lurdes Guterres, informa uma-kain 449 iha Laulara seidauk asesu bá liña eletrisidade.

“Postu Administrativu Laulara ita-nia komunidade ne’ebé seidauk asesu bá liña eletrisidade ne’e hamutuk uma-kain 449,” Isaias Lurdes Guterres bá Agência Tatoli liuhosi telefónika, segunda ne’e.

Nia hatutan komunidade uma-kain 499 ne’ebé seidauk asesu eletrisidade dezde Timor-Leste hetan ninia independénsia to’o agora.

Nia hatutan, hosi preokupasaun sira ne’e nia parte hato’o ona ba Administrasaun Munisipál inklui membru Governu balu ne’ebé hala’o vizita ba Postu Administrativu Laulara.

Postu Administrativu Laulara ho totál suku neen, aldeia 22, totál uma-kain 1.696 no tuir monografia totál populasaun 8.035.

Administradór Munisípiu Aileu, Abel da Conceição, afirma la’ós komunidade Aileu mak seidauk asesu eletrisidade maibé inklui mós postu administrativu sira seluk.

“Tinan ida ne’e Eletrisidade de Timor-Leste, Empreza Públika (EDTL, E.P) sei implementa liña eletrisidade ba suku 34 iha Timor laran tomak, prosesu tenderizasaun la’o ona ne’ebé ba munisípiu Aileu inklui Suku Tuhumeta, ida ne’e EDTL rasik mak sei kaer direta, tanba anteriormante kompañia balu tau ona besi-riin eletrisidade nian,” nia hatutan.

Nia afirma, tinan ida ne’e Munisípiu Aileu, Suku Tuhometa mak asesu uluk tanba EDTL haree gráfiku territóriu Timor laran tomak asesu ba eletrisidade, provizoriamente Munisípiu Ermera no Manufahi mak ninia asesu bá eletrisidade ne’e menus liu, entaun tinan ida-ne’e fó prioridade uluk bá munisípiu rua refere.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here