Ekipa liña frente iha Munisípiu Viqueque, hahú simu vasina AstraZeneca doze daruak, segunda (14/06/2021). Imajen Tatoli/Vitorino Lopes da Costa.

VIQUEQUE, 12 jullu 2021 (TATOLI)—To’o ohin, populasaun 16.030 iha munisípiu Viqueque, simu ona vasina COVID-19 ho tipu AstraZeneca.

“Ami atualiza vasina AstraZeneca hosi faze dahuluk, faze daruak to’o faze datoluk la’o ho susesu, tanba rezultadu hosi sosializasaun ne’ebé akipa halo,” Diretór Serbisu Saúde Munisípiu Viqueque, Francisco de Carvalho hateten ba Agência Tatoli, iha edifísiu saúde Munisípiu Viqueque, segunda ne’e.

Notísia relevante:TL hetan ona doasaun vasina COVID-19 doze 404.800

Númeru vasinante hirak-ne’e, kompostu hosi ema ne’ebé ho kategoria morbilidade, idade 60 ba leten no komunidade ho idade 18-59.

Francisco de Carvalho, observa katak populasaun barak mak interese no entuziasmu hodi simu vasina, tanba konsidera ho vasina mak bele prevene moras COVID-19.

“Parte saúde halo esforsu makaas serbisu hamutuk ho autoridade munisípiu no komunidade oinsa transmite informasaun loloos, nune’e konsege konvense komunidade hodi simu vasina,” nia subliña.

Difikuldade ne’ebé Serbisu saúde munisipál enfrenta maka, populasaun Viqueque maioria hela iha área remota, nune’e pesoál saúde-sira presija halo ezersísiu makaas, hodi bele to’o iha populasaun nia leet.

Nune’e mós administradór munisípiu Viqueque, Januário Soares, apela nafatin ba adiministradór postu, xefe suku no xefe aldeia-sira, hodi hatutan informasaun kona-bá vasina ba komunidade hodi simu vasina.

Dadus vasina provizóriu iha munisípiu Viqueque hosi postu administrativu lima maka hanesan, ema ho idade 60 ne’ebé simu ona vasina hamutuk na’in-697,  funsionáriu na’in-698, liña frente na’in 2.730, idade 18-59 na’in 955, ema ho komorbilidade  no idade 18-59 na’in 8.948, la’ós komorbilidadete no idade 60 hamutuk na’in 2.697. Totál na’in 16.030 kompostu hosi feto na’in 7.231 no mane na’in 8.799.

Pesoál saúde ne’ebé treinadu ba vasina iha munisípiu Viqueque hamutuk na’in 146 no hetan mós apoiu hosi pesoál saúde sira seluk hodi tulun-malu iha tereinu.

Dadaun-ne’e, pesoál saúde-sira destaka hotu ona iha fasilidade saúde postu, suku no aldeia hodi fó vasina ba populasaun.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here