Konversa entre Primeiru-Ministru, Taur Matan Rua, akompaña ho ninia Espoza, Isabel Ferreira Ruak, Xefe Estadu Maiór Jenerál F-FDTL, Tenente Jeneral Lere Anan Timur no Embaixadór EUA, Kevin Blackstone, iha Aeroportu Baucau, segunda (12/07). Imajen TATOLI/Natalino Belo

BAUCAU, 12 jullu 2021 (TATOLI)—Primeiru-Ministru (PM), Taur Matan Ruak, rejeita infromasaun ne’ebé dehan konstrusaun Aeródromu Baucau sei sai baze ba Militár Estadu Unidu Amerika (EUA).

“Ne’e laloos, iha espekulasaun barak hanoin EUA atu halo baze iha ne’e, maibé ha’u no Jenerál Lere Militár tinan barak, la presiza halo Baucau sai baze ba nasaun ida ne’ebé iha ponténsia Militár iha mundu. Tanba ne’e Baucau la presiza sai baze, ne’e ba ema sivíl mak dehan Baucau presiza sai baze, Militár la presiza tanba aviaun kasa ida nia semo kilómetru 3000 pur oras ,” PM hateten iha Aeroportu Baucau, segunda ne’e.

Antes ne’e, Diresaun Jerál Kombatente Veteranu (DIGCOV, sigla portugés) no Grupu Uniaun Nasionál Juventude Maubere (UNIJMA)/ativista Pro-Repúblika Demokrátika Timor-Leste (RDTL), setór II funu nafatin, husu ba Prezidente Repúblika, Francisco Guterres ‘Lu Olo’ no Primeiru-Ministru (PM) atu anula akordu reabilitasaun konjuta aeródromu Baucau ho Estadu Unidu Amérika (EUA), tanba konsidera atu sai baze ba Militár amerikanu no dehan bainhira la realiza sei halo asaun pasífika iha munisípiu balun.

Notísia relevante: DIGCOV-UNIJMA husu anula akordu reabilitasaun konjuta aeródromu Baucau

“Hau Baucau-oan nunka hanoin atu fa’an Timor-Leste ba EUA, sira ne’e haruka ba halo to’os de’it, ha’u Baucau-oan tiha sira mai halo manifestasaun kontra ha’u, la presiza, ami na’in-rua Jenerál Lere la fa’an Timor. Ema hanesan ami mak fa’an fali Timór ne’e bulak oituan maibé ita agradese ba EUA, nune’e bainhira aeroportu di’ak bele operasionaliza no daruma iha moras ruma bele evakua lalais bá Dili,” atuál Ministru Interiór afirma.

Nune’e, Xefe Governu husu atu Autoridade sira hanesan Prezidente munuipál, Xefe suku no aldeia hodi apoia no komunikaba komunidade atu koopera ba dezenvolvimentu.

Tuir planu, aeroportu Baucau iha futuru sei halo espansaun boot durante tinan 10 nia laran tamba durante tinan 20 ona aeroportu ne’e abandonadu.

“Ha’u husu Autoridade Baucau apoia másimu iha ne’e, hateten ba ita-nia populasaun atu koopera,” Xefe Ezekutivu fó hanoin.

Nune’e, PM konsidera hanesan previléjiu ida bainhira Timor-Leste halo Kooperasaun ho EUA, tamba laiha país kiik-oan hanesan Timor-Leste iha mundu mak bele fasil halo kooperasaun ho nasaun ne’e.

Notísia relevante: Timor-Leste no EUA lansa fatuk dahuluk konstrusaun konjunta Aeródromu Baucau

Tanba ne’e, tuir Xefe Governu, parseria ne’e tanba iha konfiansa atu konsolida hamutuk bazeia ba valór no prinsípiu ne’ebé kumunga hanesan demokrasia no direitu umanu ne’ebé Timor-Leste rasik lori ran mak sosa.

“Aeroportu ne’e kuandu funsiona ona, ninia rekezitu báziku mak seguransa, entaun parte hotu presiza koopera ba dezenvolvimentu ne’e.

Biban ne’e, PM husu Ministériu Transporte no Komunikasaun, liuhosi autoridade aviasaun atu fó apoia operasionál iha futuru, hafoin reabilitasaun, tuir regra ne’ebé iha.

Xefe Governu sente urgullu no agradese ba EUA liuhosi Embaixadór iha Timor-Leste, Kevin Blackstone.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here