Prezidente Komisaun Nasionál Eleisaun, Alcino Barris.

DILI, 12 jullu 2021 (TATOLI)—Partidu polítiku sira-ne’ebé hetan asentu parlamentár halo kooperasaun di’ak tanba iha responsabilidade hodi presta sira-nia relatóriu subvensaun públika ba Komisaun Nasionál Eleisaun (CNE-sigla portugés) atu halo avaliasaun no publika iha Jornál da Repúblika.

“Ida-ne’e ami halo beibeik. Bele dehan, durante ne’e partidu polítiku sira konsege koopera másimu hodi presta sira-nia relatóriu no CNE halo avaliasaun ba sira. Rezultadu avaliasaun públika iha Jornál da Repúblika,” Prezidente CNE, Alcino de Araújo Barris, esplika asuntu ne’e bainhira aprezenta relatóriu anuál 2019-2020 ba Parlamentu Nasionál, segunda ne’e.

Prezidente CNE haruka ona ba Tribunál Konta (TdC-sigla portugés) kona-ba prosesu transferénsia orsamentu no ezekusaun subvensaun ne’e, maibé la’o transparánsia no laiha problema ho orsamentu ba partidu polítiku sira.

“Demokrasia mai hosi partidu polítiku sira no CNE iha obrigasaun tomak halo esforsu atu garante ida-ne’e. Laiha partidu ida prejuizu maibé sira iha dever tenke koopera ho CNE no kooperasaun la’o di’ak tebes, ami públika aktu hotu iha Jornál Repúblika,” nia dehan.

Prezidente CNE esplika, kada tinan prevee orsamentu ho montante millaun $6 ba partidu polítiku sira-ne’ebé mak hetan asentu parlamentár no orsamentu millaun $6 ne’e hahú kedas iha 2014 no ba tinan 2013 ba kotuk ne’e sei millaun $5 ne’ebé mak aloka ba partidu polítiku sira.

Nia hatutan, lei mak define partidu polítiku sira tenke presta konta ho identifikasaun oioin, tanba osan subvensaun públika mak jere laloos ne’e krime no bele krime adminitrativa ba partidu polítiku sira.

“Partidu polítiku bele lakon direitu ne’e, karik jere laloos,” nia dehan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here