Virus ne'ebé hamosu IRA. Imajen/OMS

DILI, 12 jullu 2021 (TATOLI)-Médiku servisu Sentru Saúde Laulara, Munisípiu Aileu, Madalena da Crus de Jesus, informa hosi  janeiru to’o juñu 2021, moras ne’ebé rejistu aas iha Sentru Saúde Laulara mak moras Infesaun Respiratóriu Alta (IRA).

Notísia Relevante : Janeiru-juñu, moras IRA domina iha Fatululik

“Durante janeiru to’o mai juñu, dadus ne’ebé ami rekolla iha ita-nia postu saúde rua no postu tratamentu haat hatudu katak moras ne’ebé númeru aas ne’e mak IRA hamutuk ho pasiente 2.890, diarreia (548), no moras kulit 364,” Madalena da Crus de Jesus, informa ba Agência Tatoli liuhosi telefónika, segunda ne’e.

Nia dehan, pasiente ne’ebé  moras IRA  tanba mai hosi tempu klima hanesan agora tempu udan, no liuliu agora estrada ligasaun Dili, mai Aileu hadi’a daudaun hosi ne’e hamosu rai-rahun barak entaun bele hamosu moras, nune’e mós família balu sei te’in uza ai-sunu, sigarru-suar no ijiene pesoál.

Nia afirma, pasiente ne’ebé afeta moras IRA ne’e hahú hosi labarik, adultu inklui idózus, maibé médiku sira fó atendimentu ne’ebé di’ak ba pasiente sira entaun hotu-hotu rekuperadu, inklui mós moras kulit no diarreia.

Atu prevene moras hirak ne’e, nia dehan, daudaun ne’e sira halo sensibilizasaun no promosaun saúde nian ba komunidade bazeia polítika hosi Ministériu Saúde Munisipál liuhosi programa “Vizita Família, no SISCA,”

Nia esklarese Sentru Saúde Laulara iha Postu Saúde rua no sentru tratamentu mak hanesan, Postu Saúde Madabeno, Fatisi, Sentru tratamentu Talitu, Tohumeta no Buklelo, nune’e tuir estimasaun dadus saúde nian totál populasaun hamutuk 8.180.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here