Natar iha Atabae. Imajen TATOLI/António Gonçalves

DILI, 12 jullu 2021 (TATOLI)–Prezidente Movimentu Kamponéz Timor-Leste (MOKATIL), Hélio Dias Silva, rekomenda ba Governu, iha elaborasaun programa ba Orsamentu Jerál Estadu (OJE) 2022, tau prioridade no investe maka’as iha setór produtivu atu muda povu nia moris.

“Ita haree votu barak liu atu kontribui ba kualkér ukun, mai hosi povu agrikultór no ita haree maioria populasaun moris ho vida agrikultura, tanba ne’e husu elaborasaun Orsamentu Jerál Estadu 2022 tenke tau orsamentu ka investe iha área potensialidade hanesan agrikultura, turizmu, pekuária no peska,” Prezidente MOKATIL hateten ba Agência TATOLI, iha ninia knaar fatin, Farol, segunda ne’e.

Nia nota katak, seguransa ai-han relasiona ho situasaun ne’ebé ema hotu asesu ba fíziku, sosiál no ekonomia, ne’ebé halo asesu ba ai-han la sufisiente, seguru no laiha nutrisaun ne’ebé korresponde ba nesesidade povu ne’ebé saudável.

Nune’e, MOKATIL sujere atu haree konseitu dezenvolvimentu ekonómiku, liuliu koseitu seguransa-ai-han ne’ebé durante ne’e tanba Governu garante, maibé prezia avalia tanba la korresponde ona ho situasaun iha Timor-Leste.

“Ami sente konseitu seguransa ai-han ne’e la korresponde ona situasaun, entaun tempu to’o ona atu Governu investe iha setór potensiál hanesan agrikultura, maibé ho konseitu soberania ba ai-han,” nia rekomenda.

Konseitu soberania ai-han, tuir nia hanesan to’os-na’in ka agrikultór mak tenke sai na’in hodi prepara fini, kuda, halo manutensaun, kolleta, hafoin halo prosesamentu to’o merkadu.

Atu proteje konseitu soberania ai-han, nia husu Governu presiza kria lei atu proteje to’os-na’in sira hosi prepara fini to’o kolleta.

“Ita haree tempu to’o to’os-na’in mak tenke sai na’in ba ninia produsaun, ita hakarak hahú produsaun hosi baze to’o merkadu, povu mak tenke envolve. Tanba durante ne’e ita observa katak laiha lei ida mak proteje to’os-na’in sira,” nia hatutan.

MOKATIL iha membru kamponéz iha terrítoriu nasionál hamutuk 98.623 ho Komité Baze hamutuk 1.236, ne’ebé kada Komité Baze lidera xefe família 50 inklui kada Unidade Baze lidera hosi xefe família hamutuk 20.

Hosi totál membru ne’e, foku ba vida agrikultór hanesan natar, to’os, pekuária no kuda maek, kafé, Baunila ne’ebé eziste iha terrítoriu nasionál.

Entretantu, Governu liuhosi Semináriu Nasionál Jornada Orsamentál foin lalais hahú define tetu OJE 2022 posibilidade fixa ho biliaun $1,5, ho programa neen hanesan dezenvovlimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu siura hanean agrikultura, turizmu,ambiente no konetividade, dezenvolvimentu setór privadu no kooperativa, dezenvolvimentu no governasaun.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here