Produtu lokál iha merkadu. Imajen TATOLI/António Gonçalves

DILI, 12 jullu 2021 (TATOLI)–Prezidente Movimentu Kamponéz Timor-Leste (MOKATIL), Hélio Dias Silva, konsidera implementasaun programa Cesta Bázika ne’ebé benefisia populasaun hamutuk millaun 1,5, bele valoriza povu agrikultór produsaun agríkola.

“Ami agradese ba polítika Governu bele implemeta programa Cesta Bázika hodi fornese ai-han ba populasaun iha territóriu nasionál. Programa Cesta Bázika bele konsidera valoriza ita-nia produtu lokál sira ne’ebé kamponéz sira prodús no bele dezenvolve produtór sira nia vida,” Prezidente MOKATIL, hateten ba Agência TATOLI, iha ninia knaar fatin, Farol, segunda ne’e.

VIII Governu Konstitusionál hamosu programa Cesta Bázika iha ámbitu rekuperasaun ekónomika ba kurtu prazu, ho objetivu atu fó apoiu nesesidade bázika ba família, kombate hamlaha ba família vulnerável liu, apoiu ba agrikultór, produtór no komersiante lokál.

Tuir dadus MOKATIL, durante implementasaun Cesta Bázika, membru kamponéz fornese produtu lokál hamutuk ualu hanesan foos, batar, fore-rai, koto, foremungu, forekeli, kafé no batar Kay Rala (sorghum) hosi munisípiu 11 la inklui Dili no Rejiaun Administrativa Espesiál Oé-Cusse no Ambeno (RAEOA).

Kamponéz fornese produtu agríkola ba distributór 42

Produsaun agríkola hirak ne’e, MOKATIL konsege fornese ba kompañia distributór hamutuk 42, ho kuantidade foos tonelada 6.304, batar tonelada 5.400, koto tonelada 600, fore-rai tonelada 227, foremugu tonelada 287, kafé tonelada 167, no Batar Kay Rala (sorghum) tonelada 427.

MOKATIL ativa estrutura kamponéz sira iha nível nasionál no baze hodi serbisu hamutuk ho povu agrikultór, hahú hosi halibur hosi komité baze to’o hatama iha armazen, hafoin fornese ba empreza sira.

Hosi produsan agríkola iha ámbitu Cesta Bázika, MOKATIL konsege rekolla osan hamutuk $11.000 ba povu agrikultór no komité baze inklui joven sira ne’ebé lori produsaun hosi baze to’o mai armazen hodi fornese ba distributór sira.

“MOKATIL nia prinsípiu mak hakarak to’os-na’in sira bele prodús, prosesa, hafoin fornese ba kompañia hodi distribui ba komunidade sira,” nia akresenta.

Iha programa halibur produsaun agríkola hosi baze to’o armazen, MOKATIL kosege fó serbisu ba joven hamutuk 800.

Cesta Bázika motiva agrikultór

Prezidente MOKATIL konsidera implementasaun programa Cesta Bázika hatudu produsaun agríkola la sufisiente, liuliu iha outubru to’o novembru tinan 2020 produsaun agrikola hahú menus, maibé iha marsu no abríl 2021, povu agrikultór hahú kolleta.

Momentu ne’ebá MOKATIL observa produsaun agríkola kuaze 75% mak kontribui ba Cesta Bázika, ne’ebé povu agrikultór mós hetan benefísiu ekonómiku.

“Ha’u hanoin implementasaun programa Cesta Bázika ne’e motiva populasaun tanba ami observa kuaze natar no to’os ne’ebé kuaze tinan barak abandonadu, daudaun ne’e povu agrikultór book hotu ona hanesan iha parte munisípiu Viqueque, Covalima, Bobonaro, Baucau no seluk tan,” nia hatutan.

Nune’e, MOKATIL sujere ba Governu atu kontinua programa Cesta Bázika hodi motiva povu agríkola atu hasa’e produsaun ai-han iha rai-laran.

“Ami haree daudaun ne’e  produsaun iha baze sa’e tanba programa Cesta Bázika no fó presu di’ak, entaun motiva ita-nia agrikultór sira. Tanba durante ne’e agrikultór sira laiha dalan hodi prodús, maibé ema la hola, maibé iha ona merkadu,” nia subliña.

Presiza uniformiza folin iha futuru

MOKATIL rekomenda iha futuru implementasaun programa Governu hanesan Cesta Bázika, presiza uniformiza folin atu fó benefísiu ba povu agrikultór no empreza sira iha polítika rekuperasaun ekonómika iha ámbitu pandemia.

Governu uza meiu sistema ajudikasaun direta hodi kontrata kompañia fornesedór Cesta bázika iha terrítoriu nasiionál hamutuk 232, ho ho kálkulu fó servisu ba  timor-oan hamutuk 100.080 hodi fornese ai-han ba populasaun millaun 1,5, ne’ebé ho kada ema hetan $25 durante fulan-rua ($50), ne’ebé troka ho produtu.

Nune’e,  Hahú hosi 14 juñu, benefisiáriu ne’ebé simu ona produtu Cesta Bázika hamutuk ema millaun 1,3  resin ka reperzenta 91,8% hosi totál benefisiáriu millaun 1,5.

Totál orsamentu ba programa Cesta Bázika hamutuk millaun $82, ne’ebé ekivalente ho totál populasaun millaun 1,5 tuir lista atuál hosi Ministeriu Administrasaun Estatál (MAE).

Tuir diploma ministeriál konjutu númeru 38/2020, 26 outubru, produtu ne’ebé tama ba lista programa Cesta Bázika maka, produtu alimetár, kompostu husi foos, batar, kote/fore, amendoim, sorgum dulas, faé, amsin, fehuk ropa, susu ben, masin midae, manu, manu tolun, mina tein, mina nú, trigu, inklui moda sira hanesan ervilla, tomate, koto nurak, fore sikore, repullu, kouve, modo metan, modo mutin no modo seluk tam.

Enkuantu ba produtu ijiene maka, sabaun, álkool, deterjente, eskova nehan, pasta nehan.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here