Sala aula Eskola Bázika Sekundária 3⁰ Siklu Seisal ne'ebé konstrui hosi Forsa Naval EUA Seabees. Imajen TATOLI/Natalino Belo

BAUCAU, 12 jullu 2021 (TATOLI)–Ministru Edukasaun Juventude no Desportu, Armindo Maia, husu ba entidade atu tau-matan ba Eskola Bázika Sekundária (EBS) 3⁰ Siklu Seisal, munisípiu Baucau, ne’ebé Forsa navál Estadu Unidu Amerika (EUA) foin reabilita sala aula tolu.

“Importante mak xefe suku, aldeia, diretór eskola, alunu, no mestre sira bele tau-matan ba eskola tanba ita lakohi tinan tuir mai bainhira ita mai vizita fali eskola ida-ne’e, hetan vidru rahun hotu, animál nia foer mak nakonu, ne’e ita lakohi,” Ministru Armindo Maia hateten iha Sesial, segunda ne’e.

Notísia relevante: EUA komprometidu kontinua apoia setór edukasaun iha Timor-Leste

Nune’e, Ministru agradese ba kooperasaun bilaterál ho EUA hodi konstrui infraestrutura eskola ne’e.

Ministru konsidera, edukasaun hanesan setór importante no xave ba dezenvolvementu nasaun, tamba ne’e hahú Governu dahuluk to’o daualuk, investe maka’as iha área edukasaun.

Tuir governante ne’e, VIII Governu Konstitusional fó importánsia ba edukasaun hanesan área dezenvolvementu umanu, no kapitál sosiál, tamba ne’e iha Orsamentu Jeral Estadu (OJE) 2021, aloka osan millaun $30 ba infraestrutura edukasaun hodi konstrui no reabilita eskola 240 iha territóriu nasionál.

Ministru Armindo Maia hamutuk ho Embaixadór EUA ba Timor-Leste, Kevin Blackstone, akonpanã hosi autoridade munisipál no komunidade lokál inaugura sala aula tolu EBS 3⁰ Siklu Seisal, ne’ebé konstrui hosi Forsa Navál EUA Seabees, ho totál orsamentu ba konstrusaun $353.000, ne’ebé sei benefisia estudante hamutuk 300.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here