Xefe Estadu Maiór Jenerál F-FDTL, Tenente Jenerál Lere Anan Timur, asina livru prezensa molok partisipa iha seremónia lansamentu fatuk dahuluk reabilitasaun konjunta Aeródromu Baucau, iha Aeroportu Baucau, segunda (12/07). Imajen TATOLI/Natalino Belo

BAUCAU, 12 jullu 2021 (TATOLI)–Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lare Anan Timur, konsidera reabilitasaun konjunta Aeródromu Baucau entre Timor-Leste no Estadu Unidu Amerika (EUA) akontese tamba iha ezersísiu rua.

“Kada tinan, ita halo ezersísiu rua hanesan apoia umanitária ne’ebé tenki lori sasán barak, todan ne’ebé ita-nia Aeroportu Dili labele simu, tamba ne’e mak sira-nia alternativa Aeroportu Baucau, ezersísiu seluk mak dalan ba dame ne’ebé foku liu ba área Militár nian, tinan ne’e dalaruma fulan-agostu ka setembru sei hala’o ezersísiu, ho zona operasionál mak Baucau,” Tenente Jenerál hateten iha Aeroportu Baucau, segunda ne’e.

Notísia relevante: Timor-Leste no EUA lansa fatuk dahuluk konstrusaun konjunta Aeródromu Baucau

Lere konsidera, Aeroportu Internasionál Prezidente Nicolau Lobato, Comoro, Dili laiha kapasidade atubele simu aviaun boot sira, tanba ne’e Komandante Pasífiku hato’o prekupasaun atu reabilita Aeroportu Baucau ne’ebé nia kapasidade bele simu aviaun boot sira iha mundu tuir nesesidade povu.

Inisiativa ne’e, loloos atu realiza iha tinan rua ba kotuk, maibé tanba kestaun balun, ikus mai foin realiza lansamentu fatuk dahuluk ba reabilitasaun, liuliu ba ezersísiu Militár entre F-FDTL, EUA, Austrália ho Japaun.

“Ne’e mak nesesidade, ha’u fó hatene atu hasai dúvida maluk sira ne’ebé dalaruma la hatene tuir, tanba demokrasia, liberdade, entaun sira mós halo sira-nia espresaun ka hanoin la tuir realidade,” Lere akresenta.

Notísia relevante: DIGCOV-UNIJMA husu anula akordu reabilitasaun konjuta aeródromu Baucau

Nune’e, Tenente Jenerál konsidera EUA nia interese la’ós hanesan timor-oan barak nia intrepretasaun katak atu sai na’in ba Aeroportu Baucau.

Enkuantu, durante ne’e, prosesu koordenasaun liuhosi kooperasaun tékniku Militár, maibé ninia operasionál entrega ba Governu ne’ebé iha liu kompeténsia atu toma desizaun.

“Nia objetivu atu apoia ezersísiu sira ne’ebé EUA no F-FDTL halo kada tinan, liuliu ezersísiu harii hamutuk ne’ebé foku liu ba apoia umanitária no dalan ba dame,” Lere argumenta.

Biban ne’e, Lere husu nafatin konfiansa no apoia hosi povu ba líder nasionál sira atu konstibui ba dezenvolvimentu nasionál tanba konfiansa hahú ona iha tempu difísil nia laran.

“Fó konfiansa nafatin hodi ami lori nasaun ba di’ak, tanba se ita hotu apoia, rona no fó konfiansa ba malu, buat hotu sei la’o ho di’ak,” nia garante.

Lere hato’o agradesementu ba EUA liuhosi Embaixadór iha Timor-Leste, Kevin Blackstone, ba kolaborasaun serbisu hodi realiza inisiativa importante ne’e.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here