Prezidente Komisaun G PN, Antonio Verdial.Imajen/Antonio Goncalves

DILI, 12 jullu 2021 (TATOLI)-Prezidente Komisaun G ne’ebé trata asuntu Edukasaun, Juventude, Kultura no Sidadania, António Verdiál de Sousa, husu  ba Ministériu Edukasaun Juventude no Desportu (MEJD) no Ministériu Agrikultura no Peska (MAP) atu halo observasaun urjente ba Eskola Téknika Agríkola (ETA) Natarbora, Munisípiu Manatuto tanba la organizadu no la saudavel.

“Ministériu Edukasaun, Juventude no Desportu (MEJD) no Ministériu Agrikultura no Peska (MAP) oinsá hamutuk trata eskola ida-ne’e,  nune’e ambiente eskola bele nabilan fali. Ita hanaran tiha agríkola maibé realidade eskola ne’e sai tiha ai-laran boot,” Prezidente Komisaun G informa ba Agência TATOLI, segunda ne’e.

Rezultadu fiskalizasaun ne’ebé nia halo iha 8 fulan-jullu 2021 liubá nota eskola ne’e dezorganizadu tanba kondisaun eskola liliu sala aprendizazen la saudavel tanba nakonu ho lixu.

“Bainhira ha’u tama eskola laran banku no meza tau arbiru de’it, kadeira sira-ne’e soe tún no sa’e de’it, la hadi’a halo didi’ak no eskola laran hanesan karau-luhan, fahi-luhan no manu-luhan,” nia esplika.

Durante okupasaun Indonézia eskola ne’ebé hanaran Sekolah Pertanian Pembangunan ho kondisaun diak kompara ho daudaun ne’e, tanba ne’e MEJD no MAP presiza trata asuntu ne’e ho sériu.

“Ha’u ba to’o iha-ne’ebá, ha’u haree kondisaun eskola ha’u hakfodak tebes, aat liután dirijente eskola ne’e rasik dezde hahú aplikasaun Estadu Emerjénsia ne’ebé Estadu dekreta to’o ohin loron Diretór eskola Natarbora seidauk marka prezensa iha eskola ne’ebá,” nia esplika.

Alende dezorganizadu no la saudavel, nia parte mós identifika menus aihán ba estudante sira ne’ebé daudaun ne’e hela iha eskola refere hafoin implementasaun Estadu Emerjénsia ligadu ho COVID-19 iha Timor-Leste.

“Ha’u mós identifika estudante sira enfrenta krize aihan, agora sira atu halerik ba sé, tanba diretór eskola la marka prezensa dezde implementasaun estadu emerjénsia. Ha’u rekolla informasaun katak diretór ne’e hela tiha iha Liquiçá, depois la ba to’o agora. Piór liután mak haluha tiha nia responsabilidade. Ne’e bahasa karik estudante sira di terlantarkan oleh pimpinan sekolah nia relata.

António Verdiál husu ba MEJD no MAP atu rezolve kestaun ne’e liliu kona-ba auzensia Diretór nian tanba abandona eskola durante implementasaun EE no serka sanitaria.

Hatan ba preokupasaun ne’e Diretór Eskola Téknika Natarbora Munisípiu Manatuto, Américo Pereira da Cruz, rekoñese eskola ne’e enfreta problema menus fasilidade hanesan kadeira no meza no seluk tan durante EE.

“Ha’u informadu kona-ba fiskalizasaun Komisaun G nian, ne’ebé loos duni kondisaun eskola nian ne’e mínimu duni, maibé ETA ne’e tutela iha Ministériu Agrikultura no Peska, agora Komisaun G orienta ami atu hatama proposta ba Ministériu Edukasaun, Juventude no Desportu (MEJD), dalaruma MEJD dehan osan ne’e ba liña ministériu seluk nian,”nia informa ba Agência TATOLI, via telefónika, segunda ne’e.

Maibé kona-ba kadeira, meza, nia dehan kompañia sosa ona no konfirmadu iha tempu badak sei distribui ba eskola refere.

“Distribui sasán ne’e susar oituan tanba labarik sira-nia konsumu no lojístika sira mós ami orienta kompañia sira ba distribui de’it iha Metinaro, depois aluga tutan karreta ba fali Natarbora tanba serka sanitária mak halo hanesan ne’e,” nia esklarese.

Nia esplika profesór balun hela iha Baucau no Viqueque inklui nia rasik hela iha Bazartete Munisípiu Liquiça, labele fila lalais ba Natarbora tanba seidauk vasina dala-rua ba prevensaun COVID-19.

“Ami-nia eskola la’o nafatin tanba maioria profesór ho família sira hela hotu iha koléjiu Natarbora. Ha’u hanesan diretór entaun ha’u-nia família iha tiha Bazartete entaun ha’u atu liu de’it Dili mós ulun-moras, maibé ha’u orienta nafatin prosesu aprendizazen,” nia esplika.

Kona-ba alimentasaun ba estudante sira, nia dehan estoke sei sufisiente tanba durante ne’e halo ona distribuisaun dala-tolu

Jornalista:Evaristo Soares Martins

Editór:Agapito dos Santos

HAKEREK NO HATÁN

Please enter your comment!
Please enter your name here