Embaixadór EUA iha Timor-Leste, Kevin Blackstone. Imajen TATOLI/Natalino Belo

BAUCAU, 12 jullu 2021 (TATOLI)–Embaixadór Estadu Unidu Amerika (EUA), Kevin Blackstone, hateten, forsa konjunta kompostu hosi FALINTIL-Forsa Defeza Timor-Leste (F-FDTL) no forsa amerikanu sei hahú konstrusaun eskala kiik ba Aeródromu Baucau, iha fulan-outubru.

“Ekipa konjunta enjeñaria hosi F-FDTL no Militár Estadu Unidu Amérika (EUA) sei halo reabiliasaun eskala kiik iha inísiu fulan-outubru tinan ne’e, ne’ebé sei hadi’a lutu perímetru no konstrusaun armazen ekipamentu ne’ebé sei utiliza ba operasaun no manutensaun ba komponente aérea,” Embaixadór EUA hateten iha Aeroportu Baucau, segunda ne’e.

Notísia relevante: Timor-Leste no EUA lansa fatuk dahuluk konstrusaun konjunta Aeródromu Baucau

Diplomata dehan, projeitu ne’e sai ona vizaun Governu nasaun rua, tanba ne’e nia parte sente urgullu tamba bele halo parseria ho Timor-Leste iha área seguransa no dezenvolvimentu ekonómiku.

“Importante tebes atu realiza Timor-Leste nia mehi boot atu viabiliza aeroportu importante ida-ne’e, nune’e bele expande liután kapasidade F-FDTL no ajénsia protesaun sivíl sira, apoia dezenvolvementu ekonomia no diversifikasaun iha parte kursiál,” nia akresenta.

Embaixadór konsidera, reabilitasaun Aeródromu Baucau hanesan símbulu simples hosi Timor-Leste nia soberania, ne’ebé presiza de’it atualiza, atu nune’e bele funsiona ho permanente, nune’e bele operasionaliza agora no ba oin.

“Hau hato’o agradesimentu espesiál ba Primeiru-Ministru tanba apoia maka’as no firme ba projetu ne’e,” nia hatutan.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here