Felismina Lourdes. Imajen TATOLI/Antónia Gusmão

DILI, 12 jullu 2021 (TATOLI)–Felismina Lourdes ho idade 45, moris iha aldeia Ladiki, suku Letefoho, postu administrativu Same, munisípiu Manufahi, haknaar-an iha Fundasaun Alola liuhosi programa Suku Hadomi Inan no Oan (SHIO), desde tinan 2001 ho voluntáriamente to’o agora.

“Ha’u inklina-an iha SHIO desde tinan 2001 to’o agora. Serbisu ne’e voluntáriu no la simu osan nein sentavu ida. Momentu ne’ebá serbisu iha Manufahi, maibé sira seluk sai hotu ona no hela ha’u mesak de’it mak to’o agora, sira sai tanba la simu osan, foin lalais iha fali ema foun sai hotu,” Felismina Lourdes hateten ba Agência TATOLI, iha suku Letefoho, foin lalais ne’e.

Maski la simu osan maibé nia parte la hakiduk no firme nafatin hodi serbí ninia feto maluk sira, liuhosi fahe informasaun.

Felismina sempre fahe informasaun ba inan isin-rua, no enkoraja sira tenke ba konsulta rutina, kuandu partu tenke ba iha fasilidade saúde, hanorin inan fó susu ba bebé desde moris no tein ai-han nutritivu fó han ba bebé.

Felismina konta tuir, nia serbisu la’ós haree ba osan, maibé oinsá mak atu ajuda inan ho oan sira atu labele simu títulu ‘má nutrisaun’.

“Servisu ida-ne’e, ba ha’u la’ós serbisu ba osan, maibé oinsá ha’u atu hadomi ema seluk ne’ebé presiza tulun no la hatene tein hahán nutritivu, tanba iha inan barak mak laduun tau importánsia hodi fó hahán nutritivu ba oan sira,” nia akresenta.

Felismina la hein iha seremónia boot mak nia bele fahe informasaun, maibé iha fatin ne’ebé de’it nia sempre fahe nia matenek.

“Ha’u-nia kaben no família sira la konkorda tanba serbisu la simu saláriu, maibé ho hanoin ida fahe informasaun bele benefisia fali ema seluk. Ha’u serbisu ba Maromak tanba ha’u hadomi ema seluk, ne’ebé ha’u hetan matenek uitoan ha’u hakarak fahe mós ba ema seluk, liliu inan no oan, tanba oan ne’e futuru nasaun,” nia subliña.

Matenek ne’ebé Felismina hetan banhira envolve-an iha Fundasaun Alola liuhosi programa SHIO, ne’ebé antes ne’e hetan formasaun durante semana ida nune’e implementa to’o agora.

Nia kompremetidu hakarak nafatin serbisu voluntáriamente hodi fó benefísiu ba ema seluk, bainhira Maromak seidauk foti nia vida.

“Ema husu ha’u kona-ba saláriu no ha’u nia vida loron-loron atu sustenta an rasik no família. Maski hala’o knaar voluntáriamente maibé nafatin buka osan hodi sustenta moris família nian, hanesan halo negósiu tunu paun no sona dosi hodi fa’an,” nia haktuir.

Nune’e, nia fó mensajen ba inan sira katak, nu’udar feto tenke fó apoia ba malu tanba feto forte nasaun forte.

“Entaun nu’udar inan ida, ha’u hakarak inan sira hotu bele halo esforsu serbisu rasik, labele serbisu haree de’it ba osan maibé serbisu mós ba Nai Maromak, katak bainhira ita ajuda ema seluk ita sei hetan grasa di’ak liután,” nia enkoraja.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here