Kondisaun estrada suku Guda, postu administrativu Lolotoe, munisípiu Bobonaro, segunda (12/07/21). Imajen Tatoli/Sérgio da Cruz.

BOBONARO, 12 jullu 2021 (TATOLI)—Abitante suku Guda, postu administrativu Lolotoe, munisípiu Bobonaro, preokupa ho kondisaun estrada ne’ebé difukulta-sira atu lori produtu lokál ba merkadu Lolotoe villa.

“Ha’u-nia komunidade preokupa liu mak dalan. Estrada hosi Loloto’e vila mai suku kondisaun aat tebes. Bainhira tempu udan, labele ba faan produtu iha merkadu,” Xefe suku Guda, Caetano Fransisco, hateten ba Agência Tatoli, via telefónika segunda ne’e.

Notísia relevante:Estrada ligasaun Oe-leu ba Lolotoe besik kotu

Autoridade lokál ne’e hatutan, antes ne’e Institutu Jestaun Ekipamentu (IGE sígla portugés), halo ona rehablitasaun iha tinan hirak ba kotuk, maibé projetu ne’e laiha kontinuasaun.

Nia dehan, problema estrada halo komunidade laiha vontade atu kuda produtu lokál, tanba durante ne’e produtu ne’ebe komunidade kolleta maioria troka de’it ho sasan seluk ne’ebé sira presija.

“Iha ne’e merkadu laiha, entaun komunidade tenke lori fali sira-nia produtu ba merkadu Loloto’e vila, ho Maliana maibé kondisaun estrada la ajuda atu bele buka moris,” nia hateten.

Iha fatin hanesan, komunidade Martino da Costa Barros  haree katak, maioria populasaun iha suku ne’e moris ho vida agrikultura, no sira presija tebes asesu ba estrada, tanba rai luan no bokur ne’ebé iha poténsia ba produsaun hahán hanesan batar, ai-farina, talas, fehuk, koto, lakeru no seluk tan.

Nia dehan, suku ne’e mós iha aldeia rua mak seidauk asesu ba eletrisidade no bee moos hanesan aldeia Oceli no Anon.

“Komunidade aldeia rua ne’e utiliza de’it bee mota, no sira tenke la’o kuaze kilómetru neen mak foin bele hetan bee,” Martino da Costa Barros, hateten.

Suku Guda iha aldeia haat mak hanesan Joilpo, Oceli, Guda Taz no Anon ho totál populasaun 1.241.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here