Eskola Ensinu Baláziku Sentrál 3⁰ Siklu, Seisal. Imajen TATOLI/Natalino Belo

BAUCAU, 12 jullu 2021 (TATOLI)–Diretór Eskola Ensinu Baziku Sentrál (EBS) 3⁰ Siklu Seisal, Luís da Silva Correia, hateten, sei halo limpeza jerál eskola hanesan faze preparasaun atu reativa aula prezensiál iha segunda semana oin.

“Entaun hahú aban (13/07) ba oin, ami hahú halo preparasaun ona iha eskola, hamos aula, prepara alunu sira to’o loron 19 jullu ami hahú fali ona aula prezensiál,” Diretór eskola informa ba Agência TATOLI, iha Seisal, segunda ne’e.

Nia nota katak tuir orientasaun hosi Ministériu Edukasaun Joventude no Desportu (MEJD), ne’ebé enkamiña mai edukasaun munisipál Baucau, fó sai ona katak tuir loloos loron 12 jullu hahú ona aula prezensiál iha Baucau, hafoin termina Serka Sanitária iha rejiaun ne’e, maibé tamba ohin seremónia inaugurasaun aula tolu ne’ebé konstrui hosi Forsa Navál Estadu Unidu Amérika (EUA), entaun kansela.

Notísia relevante: EUA komprometidu kontinua apoia setór edukasaun iha Timor-Leste

Tuir Luís, daudaun ne’e sala aula ba prosesu aprendizajen iha eskola ne’e sufisiente, maski sala balun nia kondisaun a’at.

Nune’e mós, kadeira no meza seidauk sufisiente, nune’e nia parte sei hato’o kestaun ne’e ba MEJD liuhosi edukasaun munisipál atu apoia hadi’a infraestrutura eskola iha tinan tuir mai.

“Totál sala iha ne’e hamutuk 10, ne’ebé utiliza ba alunu sira sufisiente ona, meza no kadeira mak ami sei buka meiu atu bele ense, tanba ne’e ba oin ami sei kontaktu edukasaun munisipál hodi bele rezolve,” nia akresenta.

Totál alunu iha EBS 3⁰ Seisal hosi 7-9 ano eskolar hamutuk 293, enkuantu konta hamutuk Ensinu Báziku Fillial Age, Mulia-Uaiaka no Seisal ho totál estudante 900 resin no profesór 39.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here