Edifísiu Eskola Ensinu Báziku Sentrál (EBC) 02 Cabira-oan, munisípiu Viqueque. Imajen Tatoli/Vitorino Lopes da Costa.

VIQUEQUE, 12 jullu 2021 (TATOLI)—Eskola Ensinu Báziku Sentrál (EBC sígla portugés) 02 Cabira-oan munisípiu Viqueque, hahú halo preparasaun hodi hala’o limpeza iha eskola, molok ensinu apredizazen prezensiál.

“Ami simu orientasaun hosi Diretór Serbisu Edukasaun Munisípiu Viqueque, nune’e ohin ami hamutuk ho  estudante-sira hala’o limpeza to’o sábadu,” Diretora EBC 02 Cabira-oan, Rita da Costa Soares, hateten ba jornalista Agência Tatoli, segunda ne’e.

Notísia relevante:CCM Viqueque deside re-ativa ensinu aprendizazen prezensiál

Parte eskola mós iha ona regra rasik katak, bainhira hahú aula prezensiál, estudante-sira tenke uza máskara, tama aula fase liman ho sabaun no mantein distánsia sosiál.

Iha fatin seluk, Diretór Serbisu Edukasaun Munisípiu Viqueque, Emídio Amaral hateten, parte edukasaun munisipál, antes ne’e distribui ona máskara ba eskola-sira hodi uza iha tempu eskola-nian.

Tanba ne’e, tuir nia munisípiu Viqueque preparadu ba aula prezensiál tuir oráriu ne’ebé fó-sai  ona hosi Ministériu Edukasaun Joventude no Desportu (MEJD), katak, sei reativa iha 19 jullu 2021.

Profesór-hosi Cabira-oan ho ninia Ensinu Bázika  Filiál (EBF) haat, hamutu  90  simu ona vasina no na’in-17 mak seidauk simu vasina.

Estudante hosi EBC 02 Cabira-oan, mai hosi EBF Uma Quhic, EBF Wessa, EBF Tiha Aitahan no EBF Waimori Tula,  hosi  primeiru anu iha estudante 148, hosi  segundu anu 165, terseiru anu na’in 142, kuartu anu na’in 142, kintu  anu na’in 133, sestu anu na’in 156, sétimu anu na’in 175, oitavu anu na’in-120 no hosi  nonu anu na’in 190, totál estudante na’in 1.387.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here