Grupu Arte Marsiál (GAM) halo asaun dame no simu malu hodi estabelese akordu juramentu, hakribi violénsia, promeve paz iha suku Kairui, postu administrativu Laleia, munisipiu Manatuto, (10/07/21). Imajen/DNPKK.

DILI, 12 jullu 2021 (TATOLI)—Sekretária Estadu Protesaun Sivíl (SEPS), liuhosi Diresaun Nasionál Prevensaun Konflitu Komunitáriu (DNPKK), kontinua promove paz entre Grupu Arte Marsiál (GAM) no arte ritual, iha territóriu tomak.

Atividade ne’e hatudu ona, hanesan iha juñu no jullu, diresaun fasilita asaun dame no simu malu envolve GAM no arte rituál iha Betano, munisípiu Manufahi, postu administrativu Hatulia B munisípiu Ermera, postu administrativu Maubara, munisípiu Liquiça, iha Memo Maliana no iha suku Kairui, postu administrativu Laleia, munisípiu Manatuto.

Notísia relevante:Xefe Suku Caraubalu sei mobiliza membru GAM halo limpeza

Diretór DNPKK, António Viegas, hateten asaun ne’ebé  iha hodi kontribui ba paz no estabilidade iha territóriu liuliu antesipa situasaun hakmate molok tama ba eleisaun Prezidensiál no Parlamentár  ne’ebé besik ona.

“Liuhosi asaun dame no simu-malu ne’e, hodi estabelese akordu no halo juramentu atu hakribi violénsia ba  promosaun paz entre GAM ne’ebé iha konflitu pasadu,’’ António Viegas, hateten ba jornalista Agência Tatoli iha Dili, segunda ne’e.

Nia konsidera katak, antes to’o prosesu ne’e la fasil, tanba mediadór-sira ho esforsu oinsa halo aprosimasaun atu bele fasilita mediasaun to’o grupu sira simu malu.

Iha akordu ne’ebé estabelese, GAM prontu no komprometidu atu kontribui ba paz iha kada suku no bainhira kria konflitu mak sei hetan sasaun tuir kultura no lei formál ne’ebé vigora.

DNPKK mós sei realiza atividade ba grupu hanesan ba fatin sira seluk ne’ebé identifika ona.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here