Prezidente CNE, Alcino de Araújo Barris . Imajen TATOLI/Egas Cristovão.

DILI, 12 jullu 2021 (TATOLI)—Komisaun Nasionál Eleisaun (CNE-sigla portuges) lideradu Alcino de Araújo Baris, garante taxa partisipasaun hosi eleitór sira iha eleisaun prezidensiál no parlamentár liuhosi edukasaun sivika ba populasaun sira iha territoriu nasional.

Prezidente CNE esplika, lei númeru 7/2016 alterasaun daruak ba lei númeru 5/2006 artigu 8, letra d, katak kompeténsia CNE nian ida mak promove esklaresimentu objetivu ba sidadaun sira kona-ba aktu eleitorál liuhosi meiu komunikasaun sosiál.

“Durante tinan rua (2019-2020), CNE realiza edukasaun sívika iha munisípiu 12 no RAEOA ho objetivu eleva koñesimentu no hamosu sensu pertense eleitór sira-nian ba aktu eleitorál ho finalidade hasa’e taxa no kualidade partisipasaun eleitór nian iha eleisaun jerál 2022 no 2023,” Prezidente CNE esplika asuntu ne’e bainhira aprezenta relatóriu anu’al 2019 no 2020 ba Parlamentu Nasionál, segunda ne’e.

Halo segimentu ba lei ho razaun seluk CNE hala’o edukasaun sívika tanba vota la’ós obrigatóriu.

Tuir rezultadu peskiza eleitorál ne’ebé CNE halo hatudu katak eleitór idade 17 ne’e barak mak seidauk partisipa iha edukasaun sívika ne’ebé CNE organiza.

Iha parte seluk maske Timor-Leste nia index demokrasia di’ak, maibe kualidade partisipasaun polítika ladún di’ak tuir peskiza hosi The Economic Intelegence Unit nian.

Prezidente CNE haktuir, iha 2020, antes realiza atividade edukasaun sivika CNE realiza uluk peskiza eleitorál iha 2019 hodi husu hanoin eleitór rihun-sia-resin kona-ba oinsá mekanizmu di’ak halo atividade ne’e.

Hanesan segimentu ba rezultadu peskiza, molok hala’o edukasaun sívika, CNE fó uluk formasaun ba fasilitadór sira, uniformiza matéria no mellora mekanizmu aproximasaun sira.

“Iha ámbitu preparasaun ba eleisaun prezidensiál 2022 no eleisaun parlamentár 2023, iha tinan 2020, CNE realiza atividade edukasun sívika iha nivél munisípiu to’o suku sira ho frekuénsia 203 kompostu hosi suku 95, eskola 103, organizasaun feto potensiál haat (4) no PNTL ida (1), no hetan partisipasaun ativa hosi komunidade ho total 26.342. Kompozisaun partisipante ne’e kompostu hosi feto 16.674 (40,9 %) no mane 24.109 (59,1 %),” nia informa.

Atividade edukasaun sívika ne’e pertinente tanba liuhosi atividade ne’e momentu oportunu ba CNE hodi hola parte iha rezolusaun ba situasaun polítika reál ne’ebé akontese.

Prezidente CNE fó ezemplu, perante partisipante 26.342, CNE esklarese kona-ba definisaun hosi estadu direitu demokrátiku, importnásia hosi vota, oinsá forma Governu, oinsá partidu sira bele halo koligasaun, tanbasá koligasaun partidária bele fahe-malu.

Hafoin CNE estimula esklaresimentu, partisipante sira sente esklaresidu no refletidu kona-ba kestaun hirak-ne’ebé mensiona iha leten.

Iha tempu hanesan eleitór sira solisita ba CNE hodi kontinua atividade edukasaun sívika no bele kobre to’o iha nivél suku, área remota no estremamente remota sira-ne’ebé ladún asesu ba informasaun.

“Efeitu hosi edukasaun sívika ne’e hatudu duni rezultadu pozitivu, tanba iha eleisaun jerál 2017 no eleisaun antesipada 2018 taxa partisipasaun eleitór aumenta signifikativu,” Prezidente CNE ne’e hateten.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here