Prezidente CNE, Alcino de Araújo Barris . Imajen TATOLI/Egas Cristovão.

DILI, 12 jullu 2021 (TATOLI)—Komisaun Nasionál Eleisaun (CNE, sigla portugés), segunda ne’e aprezenta relatóriu anuál 2019 no 2020 ba reprezentante povu sira iha uma fukun Parlamentu Nasionál.

Submisaun relatóriu CNE ba Parlamentu Nasionál nu’udar aktu ida obrigatóriu hakbiit iha Lei númeru 7/2016, artigu 8 pontu 3, katak kada tinan CNE tenke submete relatóriu atividade ba Parlamentu Nasionál.

“Relatóriu anuál 2019 nian foka liu bá atividade preparasaun no realizasaun aktu eleitorál ba eleisaun presidensiál no Parlamentar 2017 no eleisaun parlamentár antesipada 2018. Submisaun relatóriu ba daruak foka liu ba atividade regulár após Eleisaun 2017 no 2018 nian,” Prezidente CNE, Alcino de Araújo Baris, hateten bainhira aprezenta relatóriu anu’al 2019 no 2020 ba Parlamentu Nasionál, iha uma fukun.

Relatóriu ba daruak ne’e mós nu’udar ikus ona ba mandatu dahuluk ba Komisáriu períodu 2016-2021, tuir artigu 7 Lei númeru 7/2016 katak mandatu Komisáriu sira ba tinan lima (5) no bele renova tán dala ida.

Prezidente CNE ne’e hateten, biar Timor-Leste nu’udar país foun hakbiit-aan iha setór dezenvolvimentu oioin maibe lala’ok ba siklu eleitorál la’ós ona lala’ok foun.

Dalaruma aktu familiarizadu no fasil identifika vantajen no desvantajen, no prosperiedade foun nu’udar meta atinjida satisfatóriu.

Nia dehan, preokupasaun boot ba CNE mak após eleisaun 2017-2018, hala’o kedas paresér ba lei eleitorál sira tanba durante prátika hamosu desvantajen iha aplikasaun prinsípiu normativu balun.

Hafoin CNE alarga tán forma konsultiva liuhosi peskiza nasionál hodi entende didi’ak nu’udar resposta ka feedback hosi eleitór sira ba atendimentu Órgaun Administrasaun Eleitorál.

CNE hakas-aan hasa’e koñesimentu liuhosi formasaun intensiva ba komisáriu sira no funsionariu CNE, Sekretáriadu Tékniku Administrasaun Eleitorál (STAE) iha nível nasionál, munisípiu sira, ba materia Konstitusaun RDTL, lei eleitorál sira, krime eleitorál, prosedimentu administrativa no lideransa.

Nia esplika, motivasaun ba edukasaun sívika nu’udar meiu antisipasaun hodi garante taxa partisipasaun, tanba sistema eleitorál Timor-Leste la opta votu obrigatóriu.

Prezidente CNE ne’e haktuir, komisaun hala’o akompañamentu besik ba partidu polítiku sira liu-liu partidu politiku sira-ne’ebé iha asentu parlamentar, hala’o auditoria ba subvensaun públika ne’ebé orsamentu atribui hosi Estadu, fó formasaun oinsá utliliza orsamentu ne’e ba benefísiu partidu no hasa’e koñesimentu partidu liuhosi workshop ba aktu sistema eleitorál.

“CNE ho konviksaun ida boot tebes katak atividade hirak ne’ebé hala’o ona, hala’o hela no sei hala’o tán, sei fó benefísiu boot tebes ba mudansa demokrasia iha país ida-ne’e. Ne’e sei sai nu’udar garantia ba kualidade eleisaun hirak tuir mai tanba CNE mak Rais no Abut ba demokrasia hosi povu, ho povu fila ba povu,” nia dehan.

Nia esplika, rekursu finanseira ne’ebé simu refere liu ba valór nesesária hodi bele viabiliza objetivu, meta no funsionamentu organizasionál.

Totál orsamentu ne’ebé CNE simu iha tinan 2019 ho montante $9,969,445.00 maibé orsamentu refere la’ós CNE nian de’it, tanba orsamentu ho montante $6,000.000.00 aloka ba subvensaun partidu polítiku asentu parlamentar no orsamentu ba CNE ho de’it montante $3,969,445.00, ho persentajen ezekusaun atinje 95%.

Iha tinan 2020 ho totál orsamentu $7,275,526.00, ne’ebé koloka ba CNE ho montante $1,275,526.00, ba partidu asentu parlamentár ho montante $6,000,000.00 ho ninia kategoria no persentajen ezekusaun 100%.

Nia fó-sai katak, iha 2019 CNE la enfrenta obstakúlu signifikante tanba orsamentu disponibiliza mai CNE sufisiente no ezekusaun tuir montante orsamentu ne’ebé alokadu.

Purtantu iha tinan 2020 fulan-janeiru to’o outubru, CNE ezekuta Dotasaun Orsamentu Temporáriu (DOT) ho montante $816.655,33 ba kategoria bens servisu maibé infelizmente pakote fiskál ne’ebé aloka mai ho de’it montante $490.076,00.

“Signifika orsamentu alokadu kiik liu kompara ho orsamentu ne’ebé ezekuta ona. Nune’e, CNE sofre orsamentu menus ho montante $323.579,33. Situasaun refere afeta dívida $158.484 iha tinan 2020,” Prezidente CNE ne’e fó-sai.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here