Kondisaun estrada ligasaun suku ho Munisípiu Bobonaro. Imajen Tatoli/António Gonçalves

BOBONARO, 12 jullu 2021 (TATOLI)—Abitante suku Raiheu, postu administrativu Cailaco, munisípiu Bobonaro, seidauk asesu eletrisidade no kontinua sunu lampariña iha tempu kalan.

“Populasaun iha suku tomak seidauk asesu eletrisidade. Iha ne’e komunidade balun ne’ebé iha kbiit natón uza ona Solar Panel. Maibé barak liu mak kalan sunu de’it lampariña,” Xefe suku Raiheu, Vintura Maria-Tai, informa ba jornalista Agência Tatoli  via Telefónika, segunda ne’e.

Notísia relevante:Uma Kain 12.323 iha Cailaco Seidauk Asesu ba Eletrisidade

Autoridade lokál ne’e konta, iha tempu bailoron komunidade labele sunu lampariña, tanba anin boot iha tempu kalan.

Alende ne’e, iha tempu udan komunidade ne’ebé utiliza Solar Panel labele funsiona tanba laiha loron matan atu karrega bateria.

Antes ne’e Governu apoia solar panel ba abitante hotu iha suku ne’e, maibé kondisaun aat hotu ona, no iha 2019 Governu oferese tan solar panel unidade 20, maibé la sufisiente atu responde totál uma-ka’in hotu iha suku ne’e.

Abitante Mariano de Sousa, konsidera situasaun ne’e susar duni tanba estudante-sira labele estuda iha tempu kalan.

“Ami-nia situasaun mak hanesan ne’e ona. Maibé ami la lakon esperansa no ami hein nafatin Governu atu dada eletrisidade iha suku ne’e, tuir kompromisu iha kampaña,” nia hateten.

Suku Raiheu iha aldeia tolu mak hanesan, Oho-ana, Darabasa no Lete-Aitutu, ho totál populasaun 1.676 mai hosi xefe família 362.

Jornalista  : Sérgio da Cruz

Editór        : Cipriano Colo

HAKEREK NO HATÁN

Please enter your comment!
Please enter your name here