Arguidu AS (klaran) kumpre prosesu legál no hetan seguransa másimu hosi membru Polísia. Imajen TATOLI/Nelson de Sousa

DILI, 11 jullu 2021 (TATOLI)Tribunál Distritál Dili (TDD) liuhosi primeiru interrogatóriu aplika ona medida koasaun prizaun preventiva ba arguidu AS, ne’ebé oho nia-kaben Rosantina dos Santos, nu’udar membru Polísia Nasionál Timor-Leste (PNTL) ho deviza Primeiru Sarjentu.

Bazeia ba despaixu juíz turnu, Albaro Maria Freitas, razaun aplika medida ne’e tanba iha indísiu forte arguidu envolve halakon Rosantina nia vida, iha rezidénsia Beto Barat, aldeia Anin Fuik, suku Madohi, postu administrativu Don Aleixo, munisípiu Dili, tuku 12:25 otl, iha tersa, loron 07 jullu.

Hafoin akontesimentu ne’e, suspeitu halai ses hosi lokál akontesimentu no família hosi Rosantina transporta kedan vítima ba Sentru Saúde Comoro, maibé la konsege salva vida.

Ekipa konjunta, kompostu hosi Servisu Investigasaun Kriminál Nasionál (SIKN) hamutuk ho Servisu Informasaun Polísia (SIK), iha kinta, 08 jullu, konsege identifika suspeitu nia paradeiru iha área eskola São Miguel Comoro, hafoin kontinua halo survilénsia, no ikus mai kaptura suspeitu iha área Aeroportu Internasionál Comoro, iha kinta tuku 20:30 otl kalan, hodi transporta ba edifísiu SIKN no halo identifikasaun.

Notísia relevante: SIKN detein ona AS ne’ebé deskonfia oho polísia Rosantina

Kona-ba motivu hosi kazu ne’e, seidauk iha informasaun klaru tanba iha hela prosesu investigasaun, enkuantu hosi parte Ministériu Públiku (MP) nu’udar entidade halo asaun penál, sei kontinua rekolla liután prova sira hafoin sei aprezenta ba TDD iha sesaun julgamentu normál tuir mai.

Nune’e, MP aplika krime omesídiu agravadu ba arguidu AS, ne’ebé previstu iha artigu 139  kódigu penál.

Prosesu primeiru interrogatóriu prezide hosi juíz Albaro Maria Freitas, MP reprezenta hosi Prokuradór, António Tavares no arguidu hetan asisténsia legál hosi Defensór Públiku, João de Carvalho.

Tuir informasaun ne’ebé Agência TATOLI rekolla iha terrenu, AS antes ne’e hetan kondenasaun pena prizaun efetivu hosi Tribunál tanba komete krime inséndiu no danu agravadu ho númeru prosesu 0184/19 DICMR.

Nune’e, iha loron 07 abríl 2019, AS kumpre  prizaun no iha loron 23 janeiru 2020 hetan liberdadade kondisionál hosi Tribunál.

Jornalista : Nelson de Sousa

Editora      : Julia Chatarina

HAKEREK NO HATÁN

Please enter your comment!
Please enter your name here