Mapa suku iha munisípiu Ainaro. Imajen/estatístika

AINARO, 11 jullu 2021 (TATOLI)—Komunidade suku Edi, postu administrativu Maubisse, munisípiu Ainaro halerik ba estrada no eletrisidade tanba difikulta movimentu hodi atu hala’o atividade ekonomia.

“Durante ne’e problema ne’ebé maka hasoru iha ha’u suku ne’e maka estrada, tanba estrada bele iha movimentu di’ak no fó rendimentu ekonomia ba ita-nia komunidade sira,” Xefe suku Edi, Julio Mendonça Martins, informa ba Agência TATOLI, iha sede kooperativa Cocamau, Maubisse Villa, domingu ne’e.

Tuir líder komunitáriu ne’e, komunidade ne’ebé maioria agrikultór prodús ona kafé, koto, modo, maek no produtu agríkola seluk, tanba ne’e presiza estrada di’ak hodi bele lori produtu ba merkadu lokál no nasionál.

“Maibé tanba problema estrada, komunidade labele lori produtu sira ba merkadu,” nia akresenta.

Xefe suku Edi haktuir, iha tinan 2018, membru Governu tutela ba área infraestrutura halo vizita ba suku ne’e no iha tempu hanesan observa direta kondisaun estrada iha aldeia Raimera no iha momentu ne’ebá komunidade hato’o sira proposta hadi’a estrada.

Notísia relevante: MOP loke ona konkursu públiku projetu estrada rurál munisípiu haat

“Iha ne’ebá membru Governu sira promete kedas katak sei tau prioridade ba estrada, ne’ebé sei implementa iha tinan 2019, maibé to’o agora seidauk realiza,” nia hatutan.

Aleinde ne’e, komunidade iha aldeia balun iha suku Edi preokupa tanba to’o agora seidauk asesu eletrisidade.

“Iha aldeia Hebau ho populasaun hamutuk 306 mak seidauk asesu ba naroman eletrisidade,” nia tenik.

Notísia relevante: Hahú ohin, EDTL,E.P lansa konkursu instala eletrisidade pakote 30

Iha parte edukasaun, fasilidade lubuk ida mak seidauk iha hanesan meza, kadeira, inklui sala aprendijazen ba labarik sira seidauk iha.

“Iha eskola aldeia Talale nian seidauk iha haris fatin inklui nesesidade bázika seluk,” nia katak.

Suku Edi kompostu hosi aldeia Lobibo, Rai-Mera, Tali-Felo, Talale, Demutete, Hebau, ho totál populasaun hamutuk 2.681, kompostu hosi feto 1.352 no mane iha 1.329, hosi uma-kain 552.

Iha tinan ne’e nia laran, Governu sei reabilita estrada rurál hamutuk kilómetru 291, ne’ebé finaliza ona estudu no dezeñu detalladu iha tinan kotuk.

Tanba ne’e, Ministériu Obra Públika (MOP) liuhosi Diresaun Nasionál Aprovisionamentu (DNA) loke ona konkursu públiku ba projetu estrada rurál iha munsípiu haat hanesan Manatuto, Lautém, Ainaro no Baucau.

Iha tinan ne’e, MOP mós sei reabilita estrada munisipál ho distánsia kilómetru 380, estrada urbanu kilómetru 149 inklui estrada nasionál kilómetru 49.

Iha tinan ne’e, orsamentu ba MOP hamutuk $240,673,539, ne’ebé foku ba  dezenvolvimentu, konstrusaun, reabilitasaun, manutensaun no  jestaun estrada, ponte inklui kontrolu Cheia ho montante $25,159,778, ne’ebé ekivalente 10,5% husi totál Orsamentu Jerál Estadu.

Nune’e mós, Eletricidade de Timor-Leste, Empreza Públika (EDTL, E.P) iha loron 25 maiu lansa ona konkursu públiku faze dahuluk ba projetu instalasaun eletrisidade hamutuk pakote 30 iha suku 33, hosi totál suku 76 iha territóriu nasionál ne’ebé seidauk asesu.

Jornalista : Natalino Costa
Editora      : Julia Chatarina

HAKEREK NO HATÁN

Please enter your comment!
Please enter your name here